“მივმართავ იმ ე. წ. ქოცებს, რომლებსაც რომ ჰკითხო, პრორუსები არ არიან…” – ზურაბიშვილი

იმისდა მიუხედავად, ვინ გგონიათ თქვენ ბიძინა ივანიშვილი – სამების აღმშენებელი მესია, ბრძენი პატრიოტი, არსებულ რეალობაში ყველაზე უკეთესი მმართველი ან არცთუ იდეალური, მაგრამ მაინც ნაცების ერთადერთი ალტერნატივა, მოკლედ, ვინც არ უნდა იყო შენ, რანაირად შეიძლება ისე აგეწყოს შიდაპოლიტიკური სიმპატია-ანტიპატიები თუ სიყვარულ-სიძულვილები, რომ რუსეთ-უკრაინის ომში რუსეთის წარმატება უფრო გაწყობდეს და უკრაინის წარმატება არ გიხაროდეს? რანაირად შეიძლება საკუთარი ქვეყნის ოკუპანტ სახელმწიფოს გულშემატკივრობდე სხვა ქვეყნის ოკუპაციის მცდელობაში? არ გეჩვენებათ, რომ არის ამაში რაღაც არანორმალური და პათოლოგიური?

ჰოდა, როცა ასეთ პათოლოგიურ განწყობაში აფიქსირებთ საკუთარ თავს, ვინძლო იმაზეც დაფიქრებულიყავით, რომ იქნებდა სწორედ თქვენს შიდაპოლიტიკურ სიმპატია-ანტიპატიებში და სიყვარულ-სიძულვილებშია პრობლემა? ის პოლიტიკური პოზიცია, რომლის მიხედვითაც რუსეთ-უკრაინის ომში რუსეთის მხარეს აღმოჩნდები, ხომ არანაირად არ შეიძლება იყოს სწორი და სამართლიანი? ამიტომ იქნებ აქ, ქართულ პოლიტიკაში დგახართ არსებითად არასწორ მხარეს?

კითხვა შესაძლოა რიტორიკულია, მაგრამ როგორც იტყვიან, ერთი საშუალება კიდევ ვცადე.”