“მინისტრები მიდიან და მოდიან, ანიტა რაჭველიშვილი კი ერთია და უნდა იმღეროს საქართველოსთვის, ჩემთვის უნდა იმღეროს, თქვენთვის უნდა იმღეროს, ხალხისთვის და არა მინისტრისთვის” – ასმათ ტყაბლაძე

„ალიას“ ესაუბრება მსახიობი, რესტორატორი ასმათ ტყაბლაძე.

– რას ელოდებით კულტურის ახალი მინისტრისგან, თეა წულუკიანისგან?

– რაც გააკეთა იუსტიციის სამინისტროში, იგივეს გააკეთებს აქაც, მაგრამ რამდენად იცის კულტურა, აზრზე არა ვარ, რამდენად იცის თეატრი, ოპერა, ბალეტი, სახვითი ხელოვნება, მუსიკალური ხელოვნება – რაც არის კულტურა, იცის, ეს რა არის? თუ მარტო მენეჯმენტი შეუძლია? არ ვიცი ჯერ. ენამოსწრებული კი არის ისე, ვალში არ რჩება არავის.

– კულტორის ხელოვნების კოდექსის შექმნას აპირებს, როგორც თავად დაანონსა ერთ-ერთი მოადგილის წარდგენიასას. არის ასეთი კოდექსის შექმნის საჭიროება?

– კანონი არის მთავარი, კანონი თუ არ სრულდება და კანონიერად თუ არ იქცევა ხელისუფლებაც და მოქალაქეც, ის ქვეყანა ქვეყანა არ არის. ჩემი რჩევა იქნება, კულტურის სფეროებიდან რამდენიმე კაცი შეაგროვოს და ჰკითხოს მათ, რა ხდება კულტურაში. რა არის სწორი, რა არ არის სწორი, რა სჯობია. მარტო თავად რომ ჩამოაყალიბოს და დაადგინოს, ეგ ეგრე არ არის, უნდა იცოდეს. თეატრში, მაგალითად, რა კანონი უნდა იყოს, ეგ იცის თეატრის რეჟისორმა, მსახიობმა, თეატრმცოდნემ,  გარედან რთულია. თორემ, საერთოდ, კანონი ყველგან უნდა იყოს და თეატრსაც სჭირდება თავისი კანონი, მაგრამ მის შედგენაში უნდა იყვნენ ჩართულნი კომპეტენტური ადამიანები, რომლებმაც იციან თეატრი და თუ არიან ასეთი კომპეტენტური ადამიანები დარჩენილი – არ ვიცი.

– განსხვავებულ აზრზეც ისაუბრა და თქვა, გავიგებ საიდან მოდის ეს განსხვავებული აზრი და იმასაც გავიგებ, უფასოა, თუ არაო – ეს როგორ წარმოგიდგენიათ? მოისმინეს განსხვავებულ აზრს და ვინც ეს აზრი თქვა, მასზე გამოძიებას დაიწყებს, დაიბარებს და პირდაპირ ჰკითხავს, თუ?

– მე ასე გავიგე, რომ აინტერესებს საწინააღმდეგო აზრი და რატომ არის ეს საწინააღმდეგო აზრი, ეგაც აინტერესებს, იქნებ სწორია და გასათვალისწინებელია? მე როგორც წესიერმა ადამიანმა, გავიგე ასე, რომ აინტერესებს, რას იტყვიან, რა შენიშვნა აქვს, რა იქნება სწორი, მოუსმენს – და არა ის, რომ დასაჯოს. თუ დასაჯა, მაშინ არ ყოფილა კულტურის მინისტრი. თუ დასჯას აპირებს ეგ საშინელებაა, როგორ შეიძლება საწინააღმდგო აზრის დასჯდა, უნდა აუხსნა, დაელაპარაკო, კარგი უნდა გაუკეთო… ვნახოთ, რას იზამს, რა უდევს თავში, ხომ არ ვიცით. რა წუთშიც არასწორად მოიქცევა, პირველი მე ვიტყვი, იმიტომ რომ ძალიან კარგად ვიცი, რა არის კულტურა, მსახიობი ვარ, მუსიკის პედაგოგიც ვარ, ოპერაც ვიცი, თეატრიც. თუ რამე შეეშლება, მაგასა ვიტყვი და თუ კარგს გააკეთებს – მაგასაც. ღმერთმა ქნას, რომ ცუდი არ გააკეთოს, უკვე დავიღალე ამდენი ცუდით. მოეფეროს უნდა კულტურის ხალხს. მკაცრი ხელი ყველაფერს სჭირდება, მაგრამ მკაცრი ხელი დიქტატურაში არ უნდა გადავიდეს, სასიკეთოდ უნდა იმუშაოს.

– მოისმენდით, როგორ უპასუხა მინისტრმა წულუკიანმა ანიტა რაჭველიშვილს…

– ანიტა რაჭველიშვილმა როგორც გაიგო წულუკიანის ნათქვამი განსხვავებულ აზრზე, მე ისე არ გამიგია, მე სხვანაირად გავიგე, როგორც ზემოთ ვთქვი. მინისტრები მიდიან და მოდიან და ხვალ შეიძლება აღარ იყოს წულუკიანი კულტურის მინისტრად, ანიტა კი ერთია და უნდა იმღეროს საქართველოსთვის, ჩემთვის უნდა იმღეროს, თქვენთვის უნდა იმღეროს, ხალხისთვის და არა მინისტრისთვის. ვინ არის მინისტრი? არ არის სწორი. ჩვენთვის უნდა იმღეროს. ზოგი ოპერაში საერთოდ არ დადის, არ აინტერესებს საერთოდ, მე მიყვარს, მიყვარს ანიტაც, მიყვარს იმიტომ, რომ კარგი მომღერალია, კარგი ხელოვანი, მინდა მოვისმინო, ვინ არის ჩემთვის მინისტრი, ვინც გინდა იყოს, ჩემთვის მთავარია, ხელოვანი და არა მინისტრი.

– თქვენ თქვით, რომ უნდა მოეფეროს ხელოვნების სფეროს წარმომადგენლებს მინისტრი, თუმცა, აი, პირველივე განსხვავებულ აზრს, ანიტა რაჭველიშვილის კომენტარს უპასუხა დამცინავად და არც თუ ისე თბილად – სწორია ასეთი მიდგომა?

– არ შეიძლება ასეთი საუბარი, ჯიბრით არც ხელოვანი უნდა საუბრობდეს და არც მინისტრი. ჯიბრი საზიზღრობაა და ჯიბრით არანაირი სიკეთე არ გამოდის. ჯიბრით რა გამოვა? 30 წელია ჭიდაობენ, მერე? რამე სიკეთე მოუტანა ამან ქვეყანას? არაფერი.

თამო კეშელავა, ალია