საქართველოს განათლებისა და მეცნიერების მინისტრი მიხეილ ჩხენკელი აკადემიკოს მზექალა შანიძეს დაბადების დღეს ულოცავს.
„ქალბატონო მზექალა, მთელი გულით გილოცავთ 96 წლის იუბილეს. მინდა, გისურვოთ ჯანმრთელობა და დიდხანს სიცოცხლე! ფასდაუდებელია თქვენი სამეცნიერო ნაშრომები ქართველოლოგიური მეცნიერების განვითარებაში. თქვენ გამორჩეული მეცნიერი ბრძანდებით იმ უდიდესი წვლილის გამო, რომელიც ჩვენი ქვეყნის უმნიშვნელოვანესი საგანძურის – ხელნაწერთა კვლევისა და გამოცემის საშვილიშვილო საქმეში შეიტანეთ. დარწმუნებული ვარ, მომავალი თაობები თქვენს სამეცნიერო ნაშრომებს კიდევ უფრო მეტად დააფასებენ.
თქვენი სამეცნიერო მოღვაწეობით მაღალი აკადემიური სტანდარტი დააწესეთ, რის გამოც სამაგალითო ბრძანდებით ყველა თაობის მეცნიერისათვის. კიდევ ერთხელ გილოცავთ იუბილეს!“, – აღნიშნულია მინისტრის მისალოც წერილში.
ცნობისათვის, მზექალა შანიძე 100 სამეცნიერო ნაშრომის, მონოგრაფებისა და თარგმანების ავტორია. 1953 წლიდან იგი არის თბილისის სახელმწიფო უნივერსიტეტის პროფესორი. ფილოლოგიისა და ქართული ლიტერატურის მეცნიერებათა დოქტორი, საქართველოს მეცნიერებათა ეროვნული აკადემიის წევრი, რომელსაც უდიდესი წვლილი მიუძღვის ქართული ენის შესწავლის საქმეში. ქართველი ენათმეცნიერი და ფილოლოგი, მზექალა შანიძე დაჯილდოებულია ქაქუცა ჩოლოყაშვილის ბრწყინვალების ორდენით.
კომენტარები