პარლამენტმა მესამე, საბოლოო მოსმენით მხარი დაუჭირა “საქართველოს მეცნიერებათა ეროვნული აკადემიის შესახებ” კანონში ცვლილების შეტანას” – 74 მომხრე, 0 წინააღმდეგი. ინიციატორი “ქართული ოცნებაა”. კანონპროექტი დაჩქარებული წესით განიხილეს.
კანონპროექტის ერთ-ერთი ინიციატორის გივი მიქანაძის თქმით, ცვლილებები ეხება მეცნიერებათა აკადემიაში შუალედური რგოლის, წევრ-კორესპონდენტების არჩევის წესს, რომელიც 2009 წლიდან გაუქმებულია. განმარტებით ბარათში ნათქვამია, რომ 2009 წლის 1 მაისიდან შეწყდა აკადემიის წევრკორესპონდენტთა არჩევა, რამაც “მათი მილევად რეჟიმში გადაყვანა გამოიწვია”.
“2009 წელს აკადემიის წევრთა საერთო (აკადემიკოსთა და წევრ-კორესპონდენტთა) რაოდენობა იყო 127, ხოლო დღესდღეობით მათი შემადგენლობა 78 წევრით განისაზღვრება. დღეს მოქმედი რედაქციით, წევრ-კორესპონდენტები აკადემიის წევრები არიან და მონაწილეობას იღებენ აკადემიის მართვის უმაღლეს ორგანოში, აკადემიის საერთო კრებაში, თუმცა მათი არჩევის საკანონმდებლო საფუძველი არ არსებობს”, – ნათქვამია განმარტებით ბარათში.
დოკუმენტის მიხედვით, მეცნიერებაში მიმდინარე სწრაფი ცვლილებების პირობებში ყალიბდება ახალი მიმართულებები, არსებული გამოწვევების საპასუხოდ აუცილებელია აკადემიამ შესაბამის დარგებში დროულად აირჩიოს ავტორიტეტული მეცნიერები.
“მსოფლიოში მეცნიერების სხვადასხვა დარგების სწრაფი განვითარებისთვის მნიშვნელოვანია აკადემიის წევრთა რიცხოვნობის ზრდა, რის გამოც, მიზანშეწონილია “საქართველოს მეცნიერებათა ეროვნული აკადემიის შესახებ” საქართველოს კანონში განხორციელდეს ცვლილება, რომლის თანახმად, აკადემიას კვლავ მიეცემა წევრ-კორესპონდენტთა არჩევის უფლებამოსილება”, – წერია განმარტებით ბარათში.
კანონპროექტით გათვალისწინებული არ არის წევრ-კორესპონდენტთა და სტიპენდიატთა საერთო რაოდენობის ზრდა, რომელიც 40-ს შეადგენს, საიდანაც 30 წევრ-კორესპონდენტია, 10 კი სტიპენდიატი.
mtavariarkhi
კომენტარები