პროევროპული აქციების მონაწილე მედიკოსი, პოლიციის სამმართველოში მასზე განხორციელებულ ზეწოლაზე საუბრობს – სანდრო ლიპარტელიანი, რომელიც გუშინ, აქციის დასრულების შემდეგ თბილისის სახელმწიფო უნივერსიტეტის ლექტორთან, გიორგი წოწკოლაურთან ერთად დააკავეს, “პირველებთან” ამბობს, რომ პოლიცია ეკითხებოდა, “ვინ უხდიდა ფულს აქციებზე დგომის სანაცვლოდ”.
ფსიქოთერაპევტი აცხადებს, რომ სამმართველოში გადაყვანამდე ის და წოწკოლაური პოლიციის მხრიდან ადევნების ობიექტი გახდნენ. საბოლოოდ, რამდენიმე საათის შემდეგ, ორივე მათგანი დააჯარიმეს.
პოლიციამ გიორგი წოწკოლაური და სანდრო ლიპარტელიანი გუშინ, აქციის დასრულების შემდეგ, სპორტის სასახლესთან დააკავა
მას შემდეგ, რაც პირადობები წარვიდგინეთ, მოხდა ისე, რომ ფოტოებიც გადაგვიღეს, მადლობა გადაგვიხადეს და დაგვემშვიდობნენ. ამის შემდეგ, ჩვენ მარკეტში შევედით პროდუქტის შესაძენად. “სპარიდან” მალევე გამოვედით, ისინი (პოლიციელები) ისევ იქ იდგნენ, გვითხრეს, რომ პროგრამამ ვერ აღგვიქვა, რომ ნამდვილად ვიყავით ფსიქოთერაპევტები, ჩვენი იდენტიფიცირება ვერ მოახდინეს და ამისთვის საჭირო იყო ჩვენი გადაყვანა.
გიორგიმ მოახერხა, “ლაივში” გასულიყო, ამაში ხელს გვიშლიდნენ. მე მოვასწარი ადვოკატისთვის დამერეკა. უფლებადამცველმა ითხოვა რომელიმე მათგანთან გასაუბრება მომხდარიყო, თუმცა ტელეფონი წამართვეს და არც ავტომობილში მომცეს დარეკვის საშუალება.
რა თქმა უნდა, ადევნება იყო, რადგან რუსთაველის გამზირზე არავინ მოსულა, რომ ნიღაბი არ შეიძლება (ერთ-ერთ მედიკოსს ნიღაბი ეკეთა). მათ თავისუფლად შეეძლოთ ადგილზე ეთქვათ, რომ გვაჯარიმებდნენ, ან როგორც იციან, შემდეგ დაერეკათ. ქალაქის სამმართველოში ჩვენი გადაყვანის არანაირი საჭიროება არ არსებობდა, მით უფრო ამ ფორმით.
იყო დამოკიდებულება, აქციებზე რატომ დადიხარ, ფულს ვინ გიხდის, მე ეგრევე გავმიჯნე ეს თემა და ვუთხარი, რომ არასდროს, არავის არაფერი შემოუთავაზებია”- თქვა მან.
კომენტარები