“მე და სააკაშვილი მეგობრები არ ვართ, ძმაკაცები არ ვართ და ალბათ ვერც ვერასოდეს ვიქნებით” – მელია

„ერთიანი ნაციონალური მოძრაობის“ თავმჯდომარე ნიკა მელია ტელეკომპანია „პირველთან“ ირაკლი კობახიძის განცხადებას პასუხობს და ამბობს:

„მე და მიხეილ სააკაშვილი ვართ თანამებრძოლები, მე ვარ იმ პარტიის თავმჯდომარე, რომელიც დააფუძნა მიხეილ სააკაშვილმა… მიხეილ სააკაშვილი არის ქვეყნის მესამე პრეზიდენტი, რომელსაც აქვს ძალიან დიდი დამსახურება ამ ქვეყნის წინაშე. ამას ისტორია შეაფასებს, მაგრამ მე და მიხეილ სააკაშვილი მეგობრები არ ვართ, ძმაკაცები არ ვართ და ალბათ ვერც ვერასოდეს ვიქნებით. ამას დრო სჭირდება, ცხოვრების სხვადასხვა ეტაპი უნდა გაიარო, რასაც მეგობარი ჰქვია. მეგობარი არ შეიძლება ბევრი გყავდეს.

მაგრამ საუბარი იმაზე, რომ ჩვენ ერთმანეთს ვერ ვიტანთ… კი, ძალიან ბევრი გვიკამათია, კიდევ ბევრს ვიკამათებთ. იმაზე ცხარედ ვიდრე გგონიათ, მაგრამ იმაზე დიდი შეურაცხყოფა ჩემთვის არაფერი შეიძლება იყოს როდესაც ასეთი კითხვა ტივტივდება ხელოვნურად იმ ადამიანთან მიმართებით, რომელიც დღეს ტყვეობაშია. ბევრად უფრო ახლოს ვარ ნიკა გვარამიასთან, მიმაჩნია, რომ ის არის ჩემი მეგობარი, მასთანაც ბევრი მიკამათია, მაგრამ მიხეილ სააკაშვილი სხვა მასშტაბია ერთი, ვერ ვიტანთ ერთმანეთს ეს კობახიძის და ივანიშვილის სურვილია.”