“მარტის მერე ქვეყანა არ დაქცეულა” – როგორ კონტროლდება რუსეთის მოქალაქეების შემოსვლა? – კობახიძე

ქვეყანაში რუსეთის მოქალაქეების შემოდინებას, “ოცნების” თავმჯდომარე ირაკლი კობახიძე. საგანგებო ბრიფინგზე, დასმული შეკითხვის საპასუხოდ ეხმაურება და ამბობს:

“საქართველოში მოქმედებს კონკრეტული რეჟიმი, რომელიც, სხვათა შორის, წინა ხელისუფლებამ შემოიღო 2012 წლის დასაწყისში და არანაირი რისკები დღეს არ ჩანს, აქედან გამომდინარე, აუცილებლობა იმისა, რომ გადავხედოთ ჩვენ ამ შემოღებულ სავიზო რეჟიმს არ არსებობს. დანარჩენი არის სპეკულაციები და ყველაფერი უკავშირდება ისევ და ისევე ომის პროპაგანდას, ომის რიტორიკას.

არავითარი უკონტროლო შემოსვლა არ ხდება, არავითარი რისკები არ დასტურდება, რა თქმა უნდა, პირველი ხელისუფლება არის დაინტერესებული იმით, რომ თუ რაიმე რისკი არსებობს ამის პრევენცია მოხდეს, არავითარი რისკები არ ფიქსირდება.

პასუხისმგებელი არიან შესაბამისი უწყებები და ისინი აკონტროლებენ ამ ყველაფერს. თქვენ გახსოვთ, რომ პირველი აჟიოტაჟი, ხელოვნური აჟიოტაჟი, რომელიც მარტში შეიქმნა, წარმოადგენენ ისეთ სიტუაციას თითქოს ქვეყანა დაიქცა და დაიქცეოდა რამდენიმე დღეში, თუმცა მარტის შემდეგ გავიდა ნახევარი წელი და არაფერი არ მომხდარა.

აქედან ჩანს, რომ ის აჟიოტაჟი იყო ხელოვნურად შექმნილი. ზუსტად ასევეა ხელოვნურად შექმნილი დღევანდელი აჟიოტაჟი, ცარიელ ადგილზე ახდენენ სპეკულირებას რატომ? იმიტომ, რომ მათ აქვთ კონკრეტული ინტერესი, რამენაირად შემოიტანონ ქვეყანაში, გააჩაღონ ომის პროპაგანდა.”