„მალე უარესი მდგომარეობა იქნება და ხალხის უკმაყოფილებას ბიძინას ფულებით ვერ შეაჩერებენ“

„ალიას“ „გამარჯვებული საქართველოს“ ერთ–ერთი ლიდერი, ვალერი გელბახიანი ესაუბრება.

– ხელისუფლება ძალიან მძიმე დღეშია. ეკონომიკა ჩამოშლილია, საბიუჯეტო სახსრები კი არ არსებობს, რომ ეკონომიკა ფეხზე დადგეს. მსოფლიო ეკონომიკა შემცირდა 15%–ით და ეს ტენდენცია გრძელდება. ჯერ ეკონომიკის განადგურებას ვერ აღიქვამს ხალხი, თავად ხელისუფლება. ტურიზმიდან შემოსული თანხები ჩვენი ეკონომიკის მეხუთედს, 20%–ს შეადგენდა და უამრავი ადამიანი იყო ტურიზმსა და მას მიბმულ ბიზნესებში დასაქმებული. უცხოეთში დასაქმებული ჩვენი ემიგრანტების მიერ გადმორიცხული თანხებიდან ჩვენი საზოგადოების დიდი ნაწილი ცხოვრობდა. ეს ორივე მინიმუმამდე შემცირდება, როდესაც გადაივლის პანდემია. ეკონომიკის ძალიან ბევრი დარგი ვეღარ დადგება ფეხზე, გაკოტრდებიან საშუალო და წვრილი ბიზნესები. ცხადია, ყველა არა, მაგრამ ბევრნი. არც მსხვილ ბიზნესს მოელის კარგი დღეა, შეამცირებენ სამუშაო ადგილებს. მოკლედ, დღეს ვინც დროებით უმუშევარია საგანგებო მდგომარეობის, საგანგებო წესების გამო, მათი დიდი ნაწილი უმუშევარი დარჩება. საუკეთესი შემთხვევაში, მინიმუმ, 2–3 წელი იქნება საჭირო, რომ ფეხზე დავდგეთ. მოკლედ, ბიუჯეტში რაც არის, ის ფული შეიჭმევა და მერე იმ ბიუჯეტს ვერ  შეავსებენ. უამრავი ადამიანი სახლშია გამოკეტილი ყოველგვარი ფულადი დანაზოგისა და სასურსათო მარაგის გარეშე. კატასტროფული მდგომარეობაა ქვეყანაში. უფრო გამწვავდება ყველაფერი, უფრო გაღრმავდება ეს კრიზისი.  ხალხის უკმაყოფილებას ვერ შეაჩერებენ ვერც ბიძინას ფულებით და ვერც საარჩევნო ტრიუკებით.

– მშიერი ხალხის ბუნტს ხომ არ უნდა ველოდოთ?

– კი, მოსალოდნელია ბუნტი. არ არსებობს ქვეყნის ეკონომიკური კრიზისიდან გამოყვანის გეგმა, არც ფინანსური რესურსი არსებობს, უცხოურ დახმარებებს შევჩერებივართ, რომ რაღაც თანხები მოგვცენ, რაღაც ინექციები გაკეთდეს მერე ამ ფულით ეკონომიკაში. ამ ფულის გადასროლასაც ბანკებში აპირებენ, საბანკო სუფსიდიებზეა უმთავრესად საუბარი. მისცემენ ბანკებს ფულს და ბანკები მაღალ პროცენტებში მისცემენ იმ ფულ ხალხს, ისევ ხალხის უბედურების ხარჯზე გამდიდრდებიან ბანკირები.

– ხალხი დაიმშევა ცოტა ხანში და ელემენტარულად, საჭმლის ფულის გამო აიღებენ სესხებს, მაგრამ თუ ვერ გადაიხდიან, დაუყადაღებენ უძრავ თუ მოძრავ ქონებას.

– კი, უფულო ხალხს სხვა გზა თუ არ დარჩა, ზუსტად ეგრე მოხდება. ის სხვა გზა კი არ ჩანს და არც გამოჩნდება. ჩიხშია ხელისუფლება და ხალხიც ჩიხში მოაქცია. მეც მინდა იყოს გამოსავალი, მაგრამ არ ჩანს. ასე იცის 8 წელიწადი არაფრის კეთებამ, გამოგონილ პოლიტიკურ მტრებთან ბრძოლამ  და ამის ხარჯზე ხელისუფლების შენარჩუნებამ. ამათ მრეწველობისთვის და აგრარული სექტორისთვის უნდა მიეხედათ, სხვა და სხვა ეკონომიკური დარგები უნდა შეექმნათ და აეღორძინებინათ, სასურსათო და სხვა სახის რეზერვები უნდა შექმნათ. ამათ ვურჩევ, ფიზიკის საფუძვლები მაინც ისწავლონ. ახლა უკვე არქიმედეს კანონი მოქმედებს, რაც მეტად დააწვებიან ხალხს, მით უფრო მეტ უკუდარტყმას მიიღებენ ხალხისგან და თან, ცხვირ–პირში. სოციალურ აფეთქებებს გამოიწვევს ის გაჭირვება, რომელიც წინ ელის ხალხს. ქუჩაში გამოსული მშიერი ხალხი რომ არავის დაზოგავს, ეს ყველამ კარგად იცის. ადამიანს რომ შიმშილით უკვდება შვილი, შვილიშვილი, იმას უკვე აღარაფერი აქვს დასაკარგი, იმას ვერც საგანგებო მდგომარეობა გააჩერებს, ვერ კომენდანტის საათი და ვერც ტანკების კოლონა. ეს მშიერი ხალხი თუ გამოვიდა, მერე ააყირავებენ ყველაფერს. თან, ადამიანი როდესაც შიმშილის გამო გამოვა გარეთ, იმას კანონებით ვერ დაელაპარაკები. ვერ ეტყვი, ეს და ის რატომ გააკეთეო. მიეცი პური და  ცუდს და უკანონოს არაფერს არ იზამს. ეს პური, სასურსათო მარაგი კი არ არსებობს ამ ქვეყანაში. რამდენი ხანია, სახლში გამოკეტეს ხალხი და ჯერ ხელისუფლება მათთვის დახმარების გაწევაზე– ფულად დახმარებაზე, ვაუჩერებსა თუ  თუ ე.წ. სოციალურ პაკეტებზე არც კი იღებენ  ხმას.

ლევან ჯავახიშვილი, „ალია“