ლევან ვარშალომიძის მამა კლინიკაში დაინფიცირდა კორონავირუსით – რა მოხდა “მედცენტრში”?

კორონავირუსით გარდაცვლილი აჭარის მინისტრთა კაბინეტის ყოფილი  თავმჯდომარე გურამ ვარშალომიძე ბათუმის კლინიკაში -„მედცენტრში“  ინსულტის დიაგნოზით შეიყვანეს,

კოვიდ-19-ით კი ის შესაძლოა, საავადმყოფოში მოთავსების შემდეგ, 10-14 დღეში დაინფიცირდა. ამის შესახებ ექსკლუზიურად „2020NEWS“-ს ბათუმის საკრებულოს ფრაქციის – “ნაციონალური მოძრაობის“  თავმჯდომარემ, მირდატ ქადამაძემ განუცხადა.

მისივე თქმით, კოვიდ-19-ით გარდაცვლილი 75 წლის გურამ ვარშალომიძეს „მედცენტრში“ მოთავსების დროს კორონავირუსზე ტესტი ჩაუტარდა და პასუხი უარყოფითი იყო.

„ბატონი გურამ ვარშალომიძე 75 წელს გადაცილებული იყო. მისი საავადმყოფოში მოხვედრის მიზეზი ინსულტი გახლდათ. როგორც მე ვიცი, კლინიკაში შესვლამდე გარდაცვლილი კორონავირუსით ინფიცირებული არ იყო.

მას შესვლისთანავე ჩაუტარეს კოვიდ-19-ის ტესტი, რომლის პასუხიც  უარყოფითი აღმოჩნდა, თუმცა რამდენიმე დღის შემდეგ, დაახლოებით 10-14 დღის შემდეგ გაკეთებული ტესტირებით დადგინდა, რომ ის  კორონავირუსით დაინფიცირდა. ჩემი ინფორმაციით, გარდაცვლილის მდგომარეობა გაუმჯობესებული იყო, ინსულტის თვალსაზრისით, მაგრამ კორონავირუსმა დაამძიმა პაციენტის მდგომარეობა“, – ამბობს ქადამაძე სააგენტოსთან საუბრისას.