კორონავირუსით დაავადებათა კონტროლის ცენტრის კიდევ ერთი თანამშრომელი გარდაიცვალა. ამის შესახებ ინფორმაციას დაავადებათა კონტროლის ეროვნული ცენტრი ავრცელებს.
„დიდი დანაკლისი განიცადა დაავადებათა კონტროლისა და საზოგადოებრივი ჯანმრთელობის ეროვნულმა ცენტრმა. კოვიდით დაინფიცირდა და ინფექციით გამოწვეული გართულებებით გარდაიცვალა სამედიცინო სტატისტიკის დეპარტამენტის თანამშრომელი, თამარ ფილაური.
თამარ ფილაურმა ნახევარ საუკუნეზე მეტი გაატარა ჯანდაცვის სტატისტიკის სამსახურში. ათწლეულების განმავლობაში მუშაობდა სამედიცინო სტატისტიკური ინფორმაციის დამუშავებაზე.
ქალბატონი თამარი გამოირჩეოდა საქმის მიმართ მაღალი პასუხისმგებლობის გრძნობით. იყო კოლეგებზე, მეგობრებზე, გარშემომყოფებზე განსაკუთრებით მზრუნველი პიროვნება. ყოველთვის პოზიტიური, თბილი, ყურადღებიანი, სითბოს არ იშურებდა თითოეული ჩვენგანის მიმართ.
ის მუდამ ჩვენს გულებში დარჩება,“- წერს დაავადებათა კონტროლის ეროვნული ცენტრი
კომენტარები