“კოლეგებო, არ მოშორდეთ ტყვე-პატიმრის საკანს, გააპროტესტეთ თქვენი პაციენტის მკვლელობის მცდელობა და არ დატოვოთ ის მონსტრ სახელმწიფოსთან მარტო” – ნანა გეგეჭკორი

პრეზიდენტ სააკაშვილის, როგორც პაციენტის უფლებები დარღვეულია ციხეში ტყვე-პაციენტად გახდომის პირველივე დღიდან.

დიაგნოსტიკის და მკურნალობის არც ერთ ეტაპზე ტყვე-პაციენტ სააკაშვილისთვის არ აღმოუჩენიათ კვალიფიციური სამედიცინო დახმარება. მისი დიაგნოსტიკის თუ მკირნალობის ყველა ეტაპი იყო მინიმალურ სტანდარტებზე ბევრად უარესი. ნაწილობრივ ჩახედული ვარ კონკრეტულად ამ პაციენტის სამედიცინო დახმარების დეტალებში და შეუძლებელია პროფესიული თავმოყვარეობა არ შეგელახოს ექიმს, იმდენად აცდენილია ყველაფერს ნორმალურს.

ტყვე-პაციენტი სააკაშვილის ჯანმრთელობის მდგომარეობის შესახებ ინფორმაცია არაერთხელ გაამჟღავნეს სახელმწიფო ორგანოებმა, მასთან შეუთანხმებლად. მეტიც პენიტენციალურმა სისტემამ სრულიად ამაზრზენი დანაშაული ჩაიდინა და პაციენტის ექიმთან ვიზიტი ჩაიწერა და ამსახველი ვიდეო მასალა გამოაქვეყნა პაციენტთან შეუთანხმებლად.

ესეც არ გვაკმარეს და პირდაპირ ეთერში გვაყურებინეს ტყვე-პაციენტ სააკაშვილის ციხიდან მოტაცების და ძალით, ციხის საავადმყოფოდ წოდებულ გაუგებარ დაწესებულებაში, მისი ძალადობრივად შეთრევის კადრები.

ყველაფერი რაც ამ ეპიზოდის შემდგომ ხდება ვერასდროს, ვერც ერთ გარემოებაში ვერ იქნება განხილული სამედიცინო დახმარებად.

როცა პაციენტზე “ზრუნავს” სისტემა, რომელიც ამავე დროს მასზე ძალადობს, ნებისმიერი სამედიცინო ჩარევა შეიძლება პოტენციურად შეიცავდეს დაგეგმილი მკვლელობის რისკებს.

საქართველოს კანონმდებლობით (ევროპული და ამერიკული კანონების მსგავსად) პაციენტზე ძალადობა აკრძალული და დასჯადი ქმედებაა. ამავე კანონმდებლობით ნებისმიერ პაციენტს, თუნდაც ყველაზე სასტიკ დამნაშავეს, აქვს სიცოცხლის და ჯანმრთელობის უფლება.

რა დამოკიდებულება გექნებათ ყოფილი პრეზიდენტის მიმართ ეს თქვენი პირადი საქმეა, მაგრამ ტყვე-პატიმარი სააკაშივლის მიმართ გამოჩენილი სასტიკი გულგრილობა საზოგადოების მხრიდან, არის უკიდურესად საშიში მოვლენა. თქვენივე შვილებისთვისაა საშიში იმ საზოგადოებაში ცხოვრება, რასაც ასე გულმოდგინეთ აშენებთ.

ცინიკური, გულგრილი, მკვლელი საზოგადოება არასდროს დაკმაყოფილდება ერთი მსხვერპლით. მას მუდმივად ახალი სისხლი მოსწყურდება და ხვალ ეს სისხლი შეიძლება თქვენი საყვარელი ადამიანისა აღმოჩნდეს.

ისტორიული კანონზომიერებაა, დამნაშავეებს დრო ასამართლებს. აუცილებლად დადგება იმ ექიმების პასუხისმგებლობა, ვინც დღეს ტყვე-პატიმარი სააკაშვილის ჯანმრთელობაზეა პასუხისმგებელი და რა გინდა რა მიზეზის გამო ითანამშრომლებს სისტემასთან, რომელიც უმწეო ადამიანს აწამებს.

პროფესიული სინდისი, ელემენტარული ადამიანობა და ღირსება თუ გაგაჩნიათ უბრალოდ უარი უნდა თქვათ ამ სისტემასთან თანამშრომლობაზე, არ მოშორდეთ ტყვე-პატიმრის საკანს მანამ, სანამ მას სათანადო დახმარებას არ აღმოუჩენენ. გააპროტესტეთ თქვენი პაციენტის მკვლელობის მცდელობა და თუნდაც რისკების ფასად არ დატოვოთ ის მონსტრ სახელმწიფოსთან მარტო. არ ღირს უსამართლობაში აღებული გასამრჯელოთი შვილების გამოკვება.

როგორ გააგრძელებთ ცხოვრებას უმწეო ტყვე-პატიმრის მკვლელის სახელით, მაშინ როცა თქვენი პროფესიული მოვალეობა მისი გადარჩენა იყო?

კოლეგებო, გთხოვთ, ნუ დაკარგავთ პროფესიულ და ადამიანურ ღირსებას, ნუ ითანამშრომლებთ დამნაშავე სისტემასთან და ნუ დატოვებთ უმწეო პაციენტს სიკვდილთან მარტოს…”