კარანტინში ან თვითიზოლაციაში მყოფ პირებს გაცდენილი სამუშაო დღეები სრულად აუნაზღაურდებათ. ცვლილებები ჯანდაცვის მინისტრის N281/ნ ბრძანებაში განხორციელდება.
საავადმყოფო ფურცელს, რომელიც პაციენტის შესაბამის ჯანმრთელობის მდგომარეობას დაადასტურებს, სამინისტრო გასცემს.
„კორონავირუსის გავრცელების პრევენციის ეფექტური ღონისძიებების განსახორციელებლად, ეპიდემიის გავრცელების აღკვეთის მიზნით, ჯანდაცვის მინისტრის N281/ნ ბრძანებაში ცვლილებები განხორციელდება. კერძოდ, კარანტინში ან თვითიზოლაციაში მყოფ პირებთან დაკავშირებით, სამინისტრო გასცემს საავადმყოფო ფურცლის (ბიულეტინის) ტოლფას ცნობას, რომლის საფუძველზეც დასაქმებულ ადამიანებს ლეგიტიმურად ჩაეთვლებათ და სრულად აუნაზღაურდებათ კარანტინისა და თვითიზოლაციისას გაცდენილი სამუშაო დღეები“ ,- აცხადებენ ჯანდაცვის სამინისტროში.
ჯანდაცვის პოლიტიკის სამმართველოს უფროსი ეკა ადამია აცხადებს, რომ ნორმატიულ დოკუმენტებში გათვალისწინებული ცვლილების შესაბამისად, ასეთი პირებისთვის საავადმყოფოს ფურცლის ტოლფასი სამართლებრივი ძალის მქონე დოკუმენტი გაიცემა.
„დამსაქმებლებისთვის ეს საბუთი ხელფასის გაცემის საფუძველი იქნება. ცნობის მიღება შესაძლებელია ელექტრონულად Info@moh.gov.ge-ზე განცხადების გამოგზავნის შემდეგ. ინფორმაცია ჩვენი მხრიდან გადამოწმდება. ჩვენი მონიტორინგის სამსახური ჩართულია, როგორც თვითიზოლაციაში მყოფი პირების, ასევე საკარანტინო სივრცეებში მყოფი პირების დაკვირვების პროცესში და ინფორმაციის გადამოწმების საფუძველზე გვექნება შესაძლებლობა, რომ გავცეთ ეს ცნობა“, – განაცხადა ეკა ადამიამ.
კომენტარები