კამპანია „გამომყევი აჭარაში“ ბიუჯეტს 440 ათას ლარზე მეტი დაუჯდა – დაჯილდოება უკანონოდ აშენებულ რესტორანში გაიმართა | ამის შესახებ ინფორმაციას ადგილობრივი გამოცემა ბათუმელები ავრცელებს და წერს, რომ აჭარის ტურიზმისა და კურორტების დეპარტამენტმა გამარჯვებულებს ბიუჯეტიდან ჯამში 300 000 ლარი გადაუხადა. საპრიზო თანხა ასე გადანაწილდა:
• 1 ადგილი – გუგა გიორგობიანი – 150 000 ლარი
• 2 ადგილი – ხვიჩა ასამბაძე – 70 000 ლარი
• 3 ადგილი – ნიკა გელაშვილი – 50 000 ლარი
• 4 ადგილი – ჯაბა გოგიტიძე – 30 000 ლარი
🔻 რაც შეეხება სხვა ფულად პრიზებს, დეპარტამენტში განმარტეს, რომ სხვადასხვა კატეგორიაში გამარჯვებულები კერძო კომპანიებმა დააჯილდოვეს. ჯამში, კამპანიისთვის ბიუჯეტიდან 440 789 ლარი დაიხარჯა. ხელშეკრულება გამარტივებული შესყიდვით აჭარის ტურიზმის დეპარტამენტმა ინდმეწარმე ნანა გორგილაძესთან გააფორმა.
🔻 ბათუმელების ცნობითვე, კამპანიის – „გამომყევი აჭარაში“ დაჯილდოების ცერემონია ბათუმში 30 ოქტომბერს რესტორან G17-ში გაიმართა, რომელიც უკანონოდ მუშაობს – რესტორანი ბიზნესმენ ედნარ პაპუნაიშვილს ეკუთვნის. კამპანიის პრეზენტაციისა და დაჯილდოების ღონისძიების ორგანიზებისთვის, ხელშეკრულების თანახმად, 48 ათასი ლარი დაიხარჯა.
💬 „რესტორანმა G17-მა წელს ჯერ კიდევ 2024 წელს ვადაგასული საიჯარო ხელშეკრულებით გააგრძელა მუშაობა, მაშინ, როცა იმავე მიზეზით ბათუმის მუნიციპალურმა ინსპექციამ ბულვარში ათობით კომერციული ობიექტი დაანგრია. სწორედ ამ რესტორანში გაიმართა წელს, ზაფხულში, ედნარ პაპუნაიშვილის შვილის ქორწილი. ბიზნესმენის შვილის მეჯვარე ბერა ივანიშვილი იყო“ | წერს ბათუმელები
კომენტარები