“ივანიშვილის ცემენტის ქარხანა გამონაკლისის სახით მუშაობს? პოლიტიკური ნიშნით დართეს ნება?”

ენმ-ის ფრაქციის თავმჯდომარე, რომან გოცირიძე, სოციალურ ქსელში წერს:

“კარანტინის პერიოდში იკრძალება თითქმის ყველა სახის ეკონომიკური საქმიანობა, გარდა მომსახურების სფეროს ზოგიერთი დარგისა. მიუხედავად ამისა, გამონაკლისის სახით ნებადართულია 67 საწარმოს მუშაობა, მათ შორის ივანიშვილის ან მასთან დაახლოებული პირების კომპანიებისა. თუ ეს იმით აიხსნება, რომ მაგალითად, ივანიშვილის ცემენტის ქარხნის მუშაობა აუცილებელია იმ პროექტებისათვის, რომლებიც არ შეჩერებულა, რატომ არ ვრცელდება იგი მთელ სექტორზე? ამ ლოგიკით ორჯერ და სამჯერ მეტი საწარმოების მუშაობა შეიძლება ყოფილიყო ნებადართული, რომლებიც მსგავს ან უფრო ნაკლებ რისკს შეიცავენ ვირუსის გავრცელების თვალსაზრისით.

მშენებლობები გაჩერდა, მაგრამ როგორც მთავრობაში განაცხადეს, ინდივიდუალური წესით მუნიციპალიტეტები დაუშვებენ გამონაკლისსო. ადვილი მისახვედრია, რომ ეს გამონაკლისები შეეხებათ ქართული ოცნების დეპუტატებისა თუ ხელისუფლებასთან დაკავშირებული პირების კომპანიებს. ”ელიტა ბურჯს”, რომელმაც ინფრასტრუქტურის მინისტრი აჩუქა ქვეყანას, რომ არავინ გააჩერებს, საიდუმლო არ უნდა იყოს.

პრივილეგიების დაშვება და ნებართვების პოლიტიკური ნიშნით გაცემა უკვე სახეზეა და მთავრობამ დაუყოვნებლივ უნდა შეცვალოს გამონაკლისების მინიჭების არსებული სია და დააწესოს თამაშის სამართლიანი წესები. მით უმეტეს, როგორც ჩანს, ეს შეზღუდვები არ იქნება ერთი ან ორი კვირის მანძილზე.”