“მივდივარ სინათლის საძიებლად უსასრულო წყვდიადში ” – ეს სიტყვები 21 წლის მათე დევიძემ საბოლოო სიტყვის დასრულების შემდეგ განაცხადა და დარბაზი დატოვა.
მათე დევიძემ დღევანდელ პროცესზე მოსამართლე ნინო გალუსტაშვილსაც მიმართა: “ჩვენ გვწირავთ მხოლოდ იმიტომ, რომ თქვენს მბრძანებელს ბრძანება შეუსრულოთ”.
იცით ყველამ, რომ აქ თქვენ სანახავად მოვდიოდი. დღეს ალბათ ბოლო დღე იქნება. დიდი ხანი ვეღარ მნახავთ. იცით ყველამ, რომ თბილისში აქციებზე თელავიდან ჩამოვდიოდი, რადგან თანამონაწილეებთან ერთად გამეპროტესტებინა ევროკავშირის კურსიდან გადახვევა. 19 ნოემბრის გამთენიისას, ჭავჭავაძის გამზირზე როდესაც დაიწყო ფორმიანმა დაჯგუფებამ პატარა, ლამაზი სამყაროს დანგრევა და სისხლიანი ხელებით შელახვა, მაგ დღეს 2 დღის უძილო ვიყავი. ძალიან დაღლილი ვიყავი და ვერ გავაცნობიერე, რა ხდებოდა. როდესაც მათ დაიწყეს ჩვენზე გადამეტებული ძალის გამოყენება, მე შეხლა-შემოხლაში მოვყევი.
იცით, შემდეგ რაც მოხდა. მაშინ, როცა ამდენი ჟურნალისტი და ახალგაზრდა დასისხლიანებული იყო, პოლიციელი არის თუ არა პასუხისგებაში მიცემული? შეგიძლიათ გააკეთოთ შედარება ჩვენსა და მათ შორის. ისინი არიან სისხლიან ძალაუფლებას და ფულს ამოფარებული. ჩვენ ვართ ახალგაზრდები, რომლებიც ცეცხლს დავუდექით პირისპირ. ჩვენ გვწირავთ მხოლოდ იმიტომ, რომ თქვენს მბრძანებელს ბრძანება შეუსრულოთ. მაპატიეთ, მეგობრებო, მაგრამ მე უნდა დავტოვო დარბაზი, რადგან არ შემიძლია ამ გადაწყვეტილების მოსმენა. მაპატიეთ, მაგრამ ვტოვებ თქვენ ბინძურ სამფლობელოს. მივდივარ სინათლის საძიებლად უსასრულო წყვდიადში.” – განაცხადა მათე დევიძემ.
მოსამართლე ნინო გალუსტაშვილი მათე დევიძის საქმეზე განაჩენის გამოსაცხადებლად გავიდა – სხდომა დატოვა თავად სინდისის პატიმარმა, მათე დევიძემ.
კომენტარები