ჰონგ-კონგში, მაღალსართულიან საცხოვრებელ კომპლექსში გაჩენილ მასშტაბურ ხანძარს სულ მცირე 128 ადამიანი ემსხვერპლა. დაღუპულთა რიცხვი, სავარაუდოდ, გაიზრდება, რადგან კატასტროფიდან რამდენიმე დღის შემდეგაც 200-მდე ადამიანი უგზო-უკვლოდ დაკარგულად ითვლება.
ხელისუფლებამ 11 პირი დააკავა თითქმის 80 წლის განმავლობაში ქალაქში მომხდარ ყველაზე მასშტაბურ ხანძართან დაკავშირებით. გამოძიება “ვანგ ფუკ კორტის” (Wang Fuk Court) კომპლექსში მიმდინარე სარემონტო სამუშაოებისას, შესაძლო კორუფციისა და უხარისხო მასალების გამოყენების ფაქტებზე მიმდინარეობს.
სამაშველო ოპერაცია ტაი პოს რაიონში პარასკევს დასრულდა, თუმცა პოლიცია აცხადებს, რომ მიმდინარე გამოძიების ფარგლებში გადამწვარი შენობების დათვალიერებისას, შესაძლოა, კიდევ აღმოაჩინონ ცხედრები.
ხანძარი ოთხშაბათს, დღის მეორე ნახევარში გაჩნდა და სწრაფად მოედო კომპლექსში შემავალი რვა 32-სართულიანი კორპუსიდან შვიდს, რომლებიც სარემონტო სამუშაოების გამო ბამბუკის ხარაჩოებითა და მწვანე ბადით იყო შეფუთული, ხოლო კედლებზე სითბოიზოლაციის ქაფი ჰქონდა დატანილი.
ხელისუფლების განცხადებით, საცხოვრებელ კომპლექსში, სადაც 4600-ზე მეტი ადამიანი ცხოვრობს, სახანძრო სიგნალიზაცია გამართულად არ მუშაობდა.
ჰონგ-კონგის ლიდერმა ჯონ ლიმ, სხვა ოფიციალურმა პირებმა და საჯარო მოხელეებმა, რომლებსაც გლოვის ნიშნად შავი სამოსი ეცვათ, შაბათს დილით, მთავრობის ცენტრალურ ადმინისტრაციასთან, სადაც დროშები ნახევრად იყო დაშვებული, სამი წუთი დუმილით პატივი მიაგეს დაღუპულთა ხსოვნას.
ინდონეზიის განცხადებით, ინციდენტს მისი ექვსი მოქალაქე ემსხვერპლა. ფილიპინების მხარის ინფორმაციით, მათი ერთი მოქალაქე კრიტიკულ მდგომარეობაშია, ერთი დადასტურებულად დაკარგულია, ხოლო 28 პირი, სავარაუდოდ, აღნიშნულ ტერიტორიაზე ცხოვრობდა, თუმცა მათი ადგილსამყოფელი ამ დროისთვის უცნობია.
მსხვერპლის რაოდენობით, ეს ხანძარი ჰონგ-კონგში ყველაზე ტრაგიკულია 1948 წლის შემდეგ, როდესაც საწყობში გაჩენილ ხანძარს 176 ადამიანი ემსხვერპლა.
კომენტარები