“ქართული ოცნების” თავმჯდომარე ირაკლი კობახიძე “მთავარი არხის” ეთერში ამბობს:
“…მანამდე თუ გული გვისკდებოდა ნებისმიერ სპეცოპერაციაზე, რომელიც უნდა დაწყებულიყო კონკრეტულ შემთხვევაში, დღეს, უკვე გომელაურის მინისტრობის დროს, ყველა ოპერაცია ტარდება ისე, რომ თმის ღერი არავის ვარდება. ასეთი უნდა იყოს შსს-ს ეფექტიანი მენეჯმენტი…
რაც კი პრობლემა დაუგროვდა ქართულ ოცნებას იმ მცირე მონაკვეთის განმავლობაში, დაახლოებით 1-წლიან მონაკვეთში, ყველაფერი უკავშირდებოდა სპეცპერაციებს, რომლებიც იყო გახარიას მიერ ორგანიზებული”
კობახიძის თქმით, პირველი ასეთი შემთხვევა მესტიაში მოხდა, რაც ტყის ჭრას უკავშირდებოდა და “ისე იყო დაგეგმილი არასწორად ოპერაცია, რომ შსს-ს მოუწია გამოსვლა და საკმაოდ უხეში ფორმით მოხდა ეს ყველაფერი“.
კობახიძე იხსენებს კლუბი “ბასიანის” დარბევასაც – “იქაც აბსოლუტურად არასწორად დაგეგმილი სპეცოპერაცია. ასევე უნდა გავიხსენოთ ის, რომ შემდეგ ბოდიში მოუხადა იქ, ნუ მთელი ამბები იყო.”
“შემდეგ იყო პანკისი აბსოლუტურად მძიმედ დაგეგმილი სპეცოპერაცია და ძალიან მძიმე სურათი” – ამბობს კობახიძე და გახარიას შსს-ს თანამშრომლებისთვის, “გმირი პოლიციელებისთვის შეურაცხოფის მიყენებაში” ადანაშაულებს.
…რა თქმა უნდა, დანაშაული იყო იქ ჩადენილი. მთლიანობაში, რომ გავიხსენოთ ყველაფერი, რაც დაგროვდა ყველაფერი უკავშირდებოდა არასწორად დაგეგმილ, შესრულებულ სპეცოპერაციებს, რომლებიც ყველა უკავშირდებოდა სწორედ გახარიას. ეს იყო შეცდომები, მენეჯმენტის შედეგი თუ გავლენების შედეგი, რაც უკვე დანაშაულამდე მიდის, ეს მე არ ვიცი, – ამბობს ირაკლი კობახიძე “მთავარი არხის” ეთერში.
ობიექტურობისთვის უნდა ვთქვათ, რომ კობახიძეს არ გაუხსენებია პანკისში ჩატარებული კიდევ ერთი სპეცოპერაცია, რის დროსაც თემირლან მაჩალიკაშვილი დაიღუპა და ამ ოპერაციას სწორედ ვახტანგ გომელაური ხელმძღვანელობდა, რადგან იმ პერიოდისათვის, ის გახლდათ “სუს”-ის მინისტრი, თორემ, გახარიას იმ სპეცოპერაციებზე, რომლებზედაც ახლა საუბრობს, “ალია” მუდმივად წერდა, მაშინაც, როცა ირაკლი კობახიძე და “ოცნების” სხვა წევრები ღიად ამართლებდნენ სპეცოპერაციებს და შს მინისტრ გახარიას და შემდეგაც, როცა გახარია დააწინაურეს. ამ მოდელის მიხედვით (სანამ ჩემ გვერდითაა, ცუდს არ ვიტყვი), ვინ იცის რას მოჰყვება ირაკლი კობახიძე ერთხელაც ვახტანგ გომელაურზე? როდინდელი ნათქვამია სინამდვილეში სიმართლე, ძველი ნათქვამი, თუ ახალი? ერთ დღესაც, ვახტანგ გომელაური რომ წავიდეს გუნდიდან, რას იტყვის კობახიძე “ესებუას სპეცოპერაციაზე?”
კომენტარები