განათლების მინისტრი, გივი მიქანაძე აღიარებს, რომ მას ამსტერდამის თავისუფალ უნივერსიტეტში დოქტორის ხარისხი დაცული “არ აქვს”.
მინისტრმა დღეს თქვა, რომ არა დოქტორის ხარისხი დაცული არ აქვს და მხოლოდ დოქტორანტი კანდიდატია.
ამის მიუხედავად, მიქანაძე დღეს ჟურნალისტებთან ირწმუნებოდა, რომ განათლების მინისტრად წარდგენისას, ირაკლი კობახიძეს მისი განათლების შესახებ ტყუილი არ უთქვამს.
„ძალიან სასაცილოები ხართ, მართლა ძალიან სასაცილოები ხართ, იმდენად უსუსურები ხართ. რა დიპლომზეა საუბარი? დოქტორანტი კანდიდატი… ეს თქვენ შეგიძლიათ ჩემს ნებისმიერ CV-ში ამოიკითხოთ. ძალიან სასაცილოები ხართ. როგორი უსუსურები ხართ იცით? ირაკლი კობახიძეს არაფერი არ მოუტყუებია. ირაკლი კობახიძემ თქვა, რომ ამსტერდამის თავისუფალი უნივერსიტეტის დოქტორანტიაო. იცით როგორი უსუსურები ხართ? მართლა სასაცილოები ხართ!“, – განაცხადა მიქანაძემ.
ჟურნალისტებმა დღეს მიქანაძეს ასევე ჰკითხეს, აპირებს თუ არა ის სწავლის გაგრძელებას ამსტერდამის უნივერსიტეტში, რაზეც მინისტრმა ასეთი პასუხი გასცა: “როგორც ფიქრობთ, მცალია?”
„ვაპირებ თუ არა სწავლის გაგრძელებას? როგორ ფიქრობთ მცალია? ძალიან დაკავებული ვარ. თქვენნაირი მოცლილი ასეთ უაზრობაზე… ძალიან უხერხულია… თქვენ ვერ მაჩვენებთ ვერცერთ ჩემს ბიოგრაფიულ რეზიუმეს, სადაც წერია, რომ მე მაქვს ხარისხი დაცული. ირაკლი კობახიძეს არ მოუტყუებია. იქ წერია კანდიდატი, და კანდიდატი შეიძლება აღქმული იყოს, როგორც, ასე ვთქვათ, დაცული. ეს არის ძალიან ტექნიკური საკითხი. თქვენ თუ ჩემს განათლებაში შეგაქვთ ეჭვი, ეს თქვენი საკითხია. იმაზე რატომ არ მეკითხებით ესექსის უნივერსიტეტში რომ მაქვს დაცული სამაგისტრო ხარისხი? საერთოდ არაფერზე ქმნით რაღაცას. საკუთარ თავს ჰკითხეთ, რაზე გიწევთ თქვენი პატარა აუდიტორიის კვება?!“- განაცხადა მიქანაძემ.
კომენტარები