არასამთავრობო ორგანიზაცია საქართველოს დემოკრატიული ინიციატივა (GDI), 28 ნოემბერს, პარლამენტთან მიმდინარე აქციას ეხმაურება და წერს, რომ საპოლიციო ძალებმა მშვიდობიანი მოქალაქეები უკანონოდ დაარბიეს.
ორგანიზაციის შეფასებით, “გუშინ, მთელი ღამის განმავლობაში, საპოლიციო ძალები ასრულებდნენ არალეგიტიმური ხელისუფლების უკანონო დავალებებს და უკანონოდ არბევდნენ საქართველოს მშვიდობიან მოსახლეობას.“
ორგანიზაციის განცხადებაში ასევე წერია, რომ უზურპატორის ერთადერთ დასაყრდენს რეპრესიული სისტემა წარმოადგენს, რომელიც საპოლიციო ფიზიკურ ძალაზე, პროკურატურასა და უსაფრთხოების სამსახურებზე დგას.
საქართველოში ხელისუფლება უზურპირებულია. არალეგიტიმურია პარლამენტი, არალეგიტიმურია ამ პარლამენტის მიერ არჩეული მთავრობა. მიტაცებულია სასამართლო და არ არსებობს მართლმსაჯულება.
ხელისუფლებას ახორციელებს უზურპატორი, რომელმაც უარი თქვა კონსტიტუციურ მმართველობაზე, ადამიანის უფლებების არსზე და საქართველოს აბსოლუტური უმრავლესობის ნების საწინააღმდეგოდ უარი თქვა ქვეყნის ევროპულ და დასავლურ კურსზე.
უზურპატორის ერთადერთ დასაყრდენს რეპრესიული სისტემა წარმოადგენს, რომელიც საპოლიციო ფიზიკურ ძალაზე, პროკურატურასა და უსაფრთხოების სამსახურებზე დგას.
გუშინ, მთელი ღამის განმავლობაში, საპოლიციო ძალები ასრულებდნენ არალეგიტიმური ხელისუფლების უკანონო დავალებებს. უკანონოდ არბევდნენ საქართველოს მშვიდობიან მოსახლეობას. ცდილობდნენ ცემით, ცრემლსადენი გაზით, წყლის ჭავლითა და არაადამიანური მოპყრობით ჩაეხშოთ საქართველოს მოქალაქეების ლეგიტიმური პროტესტი და ქვეყნის მომავლის დაცვის სურვილი.
და რადგან, ეს ბრძოლა ჩვენი ქვეყნის მომავლისთვის გადამწყვეტია, არ არსებობს სხვა გზა გარდა წინააღმდეგობისა!“, – წერია გავრცელებულ განცხადებაში.
კომენტარები