თამარ ბაჩალიაშვილის დედა თეონა თამაზაშვილი პროკურატურაში იმყოფებოდა. როგორც გაცხადდა, გამომძიებლებს მასთან შეკითხვები ჰქონდათ მის განცხადებასთან დაკავშირებით, რომელიც თეონა თამაზაშვილმა მისი შვილის იარაღით ვაჭრობასთან კავშირზე გააკეთა.
„გამოჩნდა ახალი ფიგურანტი ბაჩანა-2 ემზარ საბანაძის სახით, რომელმაც დააყენა ჩემი პასუხისმგებლობის საკითხი და ამის საფუძველზე ხდება ჩემი დაკითხვა“, – განაცხადა თეონა თამაზაშვილმა.
შეკითხვაზე, დაასახელებდა თუ არა იმ სამ მაღალჩინოსანს, რომლებზედაც ის განცხადებაში საუბრობდა და რომლებიც, მისი თქმით, იარაღით ვაჭრობაში არიან ჩართულნი, თეონა თამაზაშვილმა უპასუხა: „არა, ეს გამოძიებამ უნდა დაასახელოს და დოკუმენტი წარადგინოს ამაზე, თორემ მე რომ მქონოდა ის „ფლეშკა“, ამით დავასაბუთებდი და დავასახელებდი იმ ადამიანებს“.
საერთაშორისო კანონმდებლობით ადამიანის უფლებათა დაცვისა და პენიტენციური სისტემის რეფორმის ეროვნული ასოციაციის პრეზიდენტი ემზარ საბანაძე კი ამბობს, რომ ეს ქალბატონი ვალდებულია დაასახელოს წყარო.
„პროკურატურამ ძალიან კარგად იცის, ამ ქალბატონის ქმედება რა სისხლის სამართლის დანაშაულის ნიშნებს შეიცავს. მან ან წყარო უნდა დაასახელოს და ინფორმაცია მიაწოდოს შესაბამის ორგანოს, ან უნდა დადგეს მისი პასუხისმგებლობის საკითხი. ვინმემ აუხსნას ქალბატონს, რომ მისი ქმედება ანტისახელმწიფოებრივია და შესაძლოა, მისი პასუხისმგებლობის საკითხიც დადგეს“, – განუცხადა „ამბებს“ საბანაძემ.
პრაიმტაიმი
კომენტარები