“გახსოვდეთ, “ოხრანკის” აგენტი იყო მღვდელი გაპონი, ლაზარეს უშველეთ, ლაზარეს” – ზურაბ გურული

“რუსული “ოხრანკის” აგენტი, (ადრე მასე ეძახდნენ რუსები ფსბ-ს), მღვდელი გაპონი გაგიგიათ, ახალგაზრდებო?

ჩემი ბავშვობის დროს სკოლაში გვასწავლიდნენ მის კაიკაცობაზე.

იყო ასეთი აფერისტი მღვდელი, საწყალ, გულუბრყვილო მუშებს ეუბნებოდა, რომ მეფე კეთილი და საყვარელი იყო და ყველაფერი ცუდი, რაც რუსეთში ხდებოდა, მისი ბრალი კი არ იყო, არამედ მისი ბოროტი მსახურების. ჰოდა, წარუძღვა ამ საცოდავ ხალხს წინ და მიიყვანა მეფესთან საჩივლელად. მეფის სასახლესთან ჩამწკრივებულმა სალდათებმა პირდაპირ გახსნილი ცეცხლით ერთმანეთზე დააკლეს უბედურები. “სისხლიანი კვირა” ჰქვია მაგას რუსეთის რევოლუციის ისტორიაში.

იმ მუშებმა ჭკუა ისწავლეს და მერე არავის ჰქონია მსგავსი გულუბრყვილო ილუზია. მიხვდნენ ვინც იყო მეფე. სისხლით გადაიხადეს ოღონდ დაჭკვიანების ფასი.

საქართველოში საგარეო პოლიტიკური მიმართულება 2021-ში კი არა, 2012-ში შეიცვალა ხავერდოვანი კონტრ-რევოლუციით. წაიკითხეთ “ოცნების” წინასაარჩევნო დოქტრინის საგარეო პოლიტიკის თავი და მიხვდებით.

გახსოვდეთ, ისეთი სიტუაციის შექმნაზე, რომელშიც ნაძირალები ჰყვავიან, თავად ნაძირალები კი არ არიან მთავარი დამნაშავეები, არამედ ის, ვინც მათი საარსებო გარემო შექმნა.

ნუ აჰყვებით და გაჰყვებით “გაპონს”; ნუ იქნებით მის იმედზე. ნუ იქნებით გულუბრყვილონი ან სულელნი. გახსოვდეთ, “ოხრანკის” აგენტი იყო მღვდელი გაპონი.

ლაზარეს უშველეთ, ლაზარეს.

გაიხსენეთ, რომ პირობა ასეთი იყო, რუსული კანონის პროტესტანტები უპირობოდ უნდა გათავისუფლებულიყვნენ, რადგან კონფლიქტის პროვოკატორი იყო საქართველოს მთავრობა, აქედან გამომდინარე ყველა სამართლებრივი შედეგით.”