“გახარიას” კიდევ ერთი პრობლემა აქვს, რაც არ აქვს “ლელოს”, რომელმაც მანდატებიც დახია და სიებიც ჩახსნა” – დათო გამცემლიძე

ეს გამოწვევა არ არის ადგილობრივ არჩევნებში მონაწილეობა.

ხსენებული საკითხი გადაჭრით არათუ 4 აგვისტოს, არამედ მხოლოდ 3 ოქტომბერს დადგება.

მანამდე “გახარიაც” და “ლელოც”, ჭკვიანურად დამუშავებული მესიჯ- ბოქსის შესაბამისად, მუდმივად იძახებენ, რომ საარჩევნო სიების რეგისტრაცია (4 აგვისტომდე) არ ნიშნავს 4 ოქტომბრის არჩევნებში “ან აუცილებლად მონაწილეობას, ან აუცილებლად არმონაწილეობას”. ” ბევრ ცვლადზეა დამოკიდებულიო”

ოღონდ “გახარიას” კიდევ ერთი პრობლემა აქვს, რაც არ აქვს “ლელოს”, რომელმაც მანდატებიც დახია და სიებიც ჩახსნა.

“გახარიას” არც მანდატებზე უთქვამს უარი, არც სიები ჩაუხსნია.

საქმე ის გახლავთ, რომ დაახლოებით 10 დღის შემდეგ დგება ვადა, როდესაც “ოცნება” მიიღებს ლეგიტიმურ უფლებას, შეუწყვიტოს სადეპუტატო უფლებამოსილება იმ 12 დეპუტატს, ვინც გახარიის სიით გავიდა პარლამენტში.

შეუწყვიტოს სხდომების არასაპატიო მიზეზით გაცდენის გამო.

ამას რეგლამენტი ერთმნიშვნელოვნად ითვალისწინებს.

თუ ” გახარია” ამ ვადის გასვლამდე პარლამენტში “შევა”, ეს სიტუაციის აფეთქებას გამოიწვევს ოპოზიციურ კლასტერში.

ხოლო თუ არ შევლენ პარლამენტში და “ოცნება” სადეპუტატო უფლებამოსილებას შეუწყვეტთ, მაშინ კანონით შემდეგი 12 დეპუტატი შედის იმავე სიიდან….მერე 6 თვის შემდეგ იგივე განმეორდება და ა.შ.

მაგრამ….. მაგრამ…….იმ “მეორე თორმეტეულს” გახარია ისევე მყარად აკონტროლებს როგორც სიის პირველ ათეულს?!

სიის “პირველი” ათეული ის ხალხია, ვინც აქტიურად ჩანს, თუმცა სიის “ქვედა ნაწილიდან” რამდენიმე დეპუტატიც რომ შევიდეს პარლამენტში, ეს გახარიასთვის კატასტროფა იქნება, რადგან ერთის მხრივ არავინ დაიჯერებს რომ ეს მის გარეშე გაკეთდა და “თამაში” არ არის, ხოლო მეორეს მხრივ, თუ კიდეც დაიჯერებენ, მაშინ ეს საკუთარ პარტიაში კონტროლის არარსებობის ანუ სისუსტის მაჩვენებელი იქნება.

ალბათ მაინც “ბ” ვარიანტს გარისკავს, ესე იგი “მეორე თორმეტეულის” შესვლას.

ოღონდ… ძალიან ძნელი გამოდგა ამ პარტიისგან პასუხის მიღება მარტივ კითხვაზე: აქვთ თუ არა დაწერილი განცხადება პარლამენტის სახელზე ოფიციალური ბოიკოტის შესახებ და თუ აქვთ, რა უპასუხათ პარლამენტის პროფილურმა კომიტეტმა?