პარტია „ქართული ოცნების“ თავმჯდომარის, ირაკლი კობახიძის განცხადებით, გიორგი გახარიას ფაქტორი მმართველი პარტიის საარჩევნო შედეგზე ვერავითარ გავლენას ვერ მოახდენს და ეს საკითხი პარტიისთვის აქტუალური არ არის.
ირაკლი კობახიძე:
„რაიმე მიზერული გავლენა შეიძლება მოახდინოს, მაგრამ პრინციპულად ჩვენს საარჩევნო მიზანს მივაღწევთ და ამას არ ექნება არათუ განმსაზღვრელი, არამედ რაიმე ფორმის არსებითი მნიშვნელობაც კი.
თავის დროზე ჩვენ ბევრი რამ გავაკეთეთ იმისათვის, რომ შექმნილიყო ეს რეიტინგი. ჩვენს გარდა სხვებიც აკეთებდნენ ამას. საბოლოო ჯამში, ეს რეიტინგი შეიქმნა, თუმცა ეს რეიტინგი იყო არსებითად დაკავშირებული მმართველ ძალასთან. ის იყო პრემიერ-მინისტრი „ქართულ ოცნებაში“ და აქედან გამომდინარე, ბუნებრივია, ეს ფაქტორი არსებითად განსაზღვრავდა ამ რეიტინგს. ახლა შეგვიძლია, ეს რეიტინგები გადავამოწმოთ და ვნახავთ, რა არის სურათზე. ჩვენ გვაქვს ეს სურათი და მინდა გითხრათ, რომ სურათი არის არსებითად შეცვლილი.
გახსოვთ, გასული 7 არჩევნები როგორ დასრულდა “ქართული ოცნების” სასარგებლოდ. ამ შემთხვევაშიც ეს ამოცანა გვაქვს და ამ მიზანს აუცილებლად მივაღწევთ, „ქართული ოცნება“ თვითმმართველობის არჩევნებში ხმების 43%-ის აღებისთვის იბრძოლებს და გახარიას გუნდი მას ხმებს ვერ წაართმევს, შეიძლება ჰქონდეს მიზანი ამ გუნდს, რომ რაღაც ჩამოგვაკლოს, მაგრამ ჩვენი საარჩევნო მიზანი აუცილებლად შესრულდება“
საქართველოს ყოფილი პრემიერ-მინისტრი, გიორგი გახარია ხვალ, 29 მაისს პოლიტიკურ გაერთიანებას “საქართველოსთვის” აფუძნებს. კონფერენცია 17:00 საათზე თბილისში, “ექსპო-ჯორჯიაში” გაიმართება.
კომენტარები