,,კავკასიის სახლის” წევრი, ლევან ლორთქიფანიძე სოციალურ ქსელში წერს:
,,1979 წელს ხალხის მიერ პირველად არჩეული ევროპარლამენტის თავმჯდომარე სიმონე ვეილი გახდა. საფრანგეთის ჯანდაცვის ყოფილი მინისტრი ჰოლოკოსტის დროს აუსშვიც-ბირკენაუს ბანაკის ტყვე იყო. ყველაზე სახალხო საერთო ევროპული კრების მეთაურად მისი არჩევა მეოცე საუკუნის უდიდესი ტრაგედიის გადააზრებისა და ახალ თანამეგობრობაში სამოქალაქო მშვიდობის განსაკუთრებული მნიშვნელობის სიმბოლო გახლდათ.
გერმანიის ბუნდესტაგის დღევანდელი პრეზიდენტი ვოლფგანგ შოიბლე თითქმის 50 წელია პარლამენტის წევრია, არაერთი კანცლერის პირობებში არაერთი სამინისტროს ხელმძღვანელი ყოფილა. გლობალური ეკონომიკური კრიზისის შემდგომ პერიოდში ფინანსთა ფედერალური მინისტრის პოსტზე მუშაობის დროს განუზომელი გახადა გერმანული კაპიტალის გავლენა ევროპის ღარიბ ქვეყნებზე. ფსიქიკურად დაავადებული ადამიანის თავდასხმის გამო 1990 წლიდან ეტლით მოსარგებლეა. იგი გერმანული პოლიტიკის ქრისტიან-დემოკრატიული, ბიურგერული ტრადიციებისა და შეუპოვრობის სიმბოლოდ ითვლება.
საქართველოს დემოკრატიული წესებით არჩეული პირველი პარლამენტის პირველი თავმჯდომარე, ბ-ნი კარლო ჩხეიძე მთელ მსოფლიოში ცნობილი და გავლენიანი სოციალისტი, ცარისტული რეჟიმის დამხობის ერთ-ერთი ავტორი, ილია ჭავჭავაძის საფლავზე საქართველოს მუშათა კლასის სახელით სიტყვის წარმომთქმელი გახლდათ. იგი პირველ რესპუბლიკასა და საერთაშორისო მემარცხენე მოძრაობას შორის ხიდის ფუნქციას ასრულებდა.
პრეზიდენტი გამსახურდია და პრეზიდენტი შევარდნაძე სანამ სახელმწიფოს მეთაურის თანამდებობაზე დაწინაურდებოდნენ, იქამდე პარლამენტის თავმჯდომარეები იყვნენ და გრანდიოზული მნიშვნელობისა და ავტორიტეტის პოლიტიკოსები გახლდნენ.
90-იან წლებში ევროსაბჭოში საქართველოს ინტეგრაციისა და ლიბერალური დემოკრატიის პირველადი ინსტიტუტების მშენებლობის საქმეს სათავეში პარლამენტის თავმჯდომარე ზურაბ ჟვანია ედგა…
ეს კუჭავა ვინ არის? რა უნდა? რისი სიმბოლოა? რა სირცხვილია… როგორ შეიძლება ასეთ წარმომადგენლობით პოსტზე ასეთი უსახოს დანიშვნა.
მაგრამ თმას მაინც იწესრიგებს, ცოტა შეღავათია.”
კომენტარები