“ერთი დაკვირვება ვაწარმოე ანტივაქსერებზე და დავასკვენი…” – რას წერს მაია ბუწაშვილი

ინფექციონისტი, მაია ბუწაშვილი:

როდესაც ვეკითხები, თავიანთ/ახლობლების შვილებს უტარებენ თუ არა აცრებს (მაგალითად მომყავს წითელა ამჟამად არსებული ეპიდსიტუაციიდან გამომიდინარე), ზოგიერთი მპასუხობს, რომ აცრებს, რა თქმა უნდა, უტარებს და „წითელა საერთოდ რა შუაშია როცა ვაქცინებზეა ლაპარაკი“, „აცრას ბავშვებს როგორ არ ვუტარებთ“ და ა.შ.

ანუ, ჩემი მოკრძალებული დასკვნა ასეთია – რადგანაც იმუნიზაციაზე კომუნიკაცია აუცილებელია ნებისმიერ ჯგუფთან, ვაქცინებზე ლაპარაკისას მგონი ჯობია სიტყვა „აცრა“ გამოვიყენოთ, თორემ ზოგიერთებს სიტყვა ვაქცინაზე პირდაპირ კოვიდ ვაქცინა უტივტივდებათ გონებაში და აღარც კი ცდილობენ წაიკითხონ/მოისმინონ სხვა ინფექციებზე აცრების მნიშვნელობა. ცხადია, ჭეშმარიტი, მამალი ანტივაქსერებიც არსებობენ, რომლებიც სრულიად გააზრებულად ებრძვიან ყველანაირ ვაქცინას, მათ შორის წითელას, წითურას თუ სხვა ვაქცინებს.

აქვე დავამატებ, რომ ზოგიერთი აქტიური ანტივაქსერი თავის შვილებს/შვილიშვილებს უტარებს ბავშთა ასაკის აცრებს და სხვებს მოუწოდებს არ აიცრან. არაერთხელ გამოიკვეთა, რომ ეს სხვადასხვა ანგარების მიზნით ხდება.

დანაშაულია სხვა ადამიანისთვის უმძიმესი ინფექციების აცრების საწინააღმდეგო მოწოდება. თუ თქვენს გამო ადამიანი აცრას გადაიფიქრებს და შემდეგ ეს ინფექცია დაემართება (რომელიც შეიძლება მისთვის მომაკვდინებელიც აღმოჩნდეს), პასუხისმგებლობის ეს ტვირთი როგორ უნდა ატაროთ მთელი ცხოვრება?