დიდ ბრიტანეთში საქალწულე აპკის აღდგენის ოპერაცია და ქალწულობის შემოწმება აიკრძალება

დიდი ბრიტანეთის მთავრობა საქალწულე აპკის აღდგენის ოპერაციის აკრძალვას გეგმავს. ოპერაციის, სახელად ჰიმენოპლასტიკის, მიზანია, ხელახლა შექმნას ქალის საქალწულე აპკი, რომლის ქორწინებამდე დაკარგვაც ზოგიერთ კულტურაში “ღირსების შეურაცხყოფასთან” არის გაიგივებული.

ჰიმენოპლასტიკის ღირებულება ადგილობრივ კლინიკებში 4000 დოლარია. მთავრობა ოპერაციის აკრძალვასთან ერთად ქალწულობის ტესტირების აკრძალვასაც გეგმავს.

მთავრობის განცხადებით, აკრძალვის მიზანი ქვეყანაში “დაუცველი ქალებისა და გოგოების უსაფრთხოებაზე ზრუნვაა”, ხოლო ჯანდაცვის მსოფლიო ორგანიზაციის თანახმად, საქალწულე აპკის არსებობა ხშირად სქესობრივი ურთიერთობის არქონას საერთოდ არ უკავშირდება.

ჯანდაცვის მსოფლიო ორგანიზაციის მონაცემების მიხედვით, დღეს 20 ქვეყანაში ტარდება ქალწულობის ტესტირება, რომელიც ვაგინის ინვაზიური კვლევის მეშვეობით ადგენს, საქალწულე აპკი ხელუხლებელია თუ არა.

გაუპატიურების ერთი-ერთი მსხვერპლის განცხადებით, წლების განმავლობაში ოჯახი საქალწულე აპკის აღდგენის ოპერაციას აიძულებდა. “ვგრძნობდი, რომ არჩევანი არ მქონდა. მეუბნებოდნენ, რომ ეს ერთადერთი რამ იყო, რისი გაკეთებაც შემეძლო”, – აღნიშნა მან BBC-თან ინტერვიუში.

ქალმა ოპერაციაზე უარი თქვა, თუმცა ოჯახის მხრიდან ზეწოლა ისევ გაგრძელდა. ყველაფერი მაშინ დამთავრდა, როცა ისეთ ადამიანზე დაქორწინდა, რომელსაც მისი საქალწულე აპკის ხელშეუხებლობის საკითხი არ აწუხებდა. მისი თქმით, ამაყობს, რომ აპკის აღდგენის პროცედურაზე უარი განაცხადა.