“დიახ, უნდა წასულიყო ყაველაშვილი ირანში. სწორი გადაწყვეტილებაა” – გამზარდია

პოლიტიკური ფილოსოფიის დოქტორი, პროფესორი, არჩილ გამზარდია:

ირანში დაკრძალვაზე პრეზიდენტის წასვლა ძალიან ფაქიზი თემაა, რადგან, როცა ორ მეგასახელმწიფოსთან ურთიერთობაზეა საუბარი, ასე მარტივად ვერც ჩვენ მივუდგებით და ვერც სხვა ვინმე. ამ ყველაფერსაც აქვს საზღვრები, რის იქითაც არ უნდა წახვიდე. სადამდე ხარ კეთილსინდისიერი არსებული პოლიტიკის წარმოებაში, ამას თავისი საზღვრები გააჩნია. არაფერს ვამბობ, ბუნებრივია, სხვა ტიპის ურთიერთობებზე, მაგრამ ნებისმიერი კეთილგანწყობილი ქვეყნისთვის გასაგები უნდა იყოს ის ფაქტი, რომ ირანთან კონფრონტაციაში ჩვენ ვერ შევალთ და არც უნდა შევიდეთ. ასეთ შემთხვევაში საქართველო კონფრონტაციას უნდა მოერიდოს.

ამიტომ, როდესაც საუბარია დაკრძალვის ცერემონიაზე, იქ არწასვლა ჩვენი მხრიდან უკვე თავისთავად პასუხი იქნებოდა, ეს პასუხი კი – კონფრონტაციული. შესაბამისად, ამ მხრივ გადაწყვეტილების დიდი არჩევანი არც ყოფილა. სახელმწიფო სწორედ ამ ზომიერების ფარგლებში უნდა მოქცეულიყო. ეს ნაბიჯი სხვა არაფერს აჩვენებს, გარდა იმისა, რომ საქართველოს სჭირდება კეთილგანწყობილი ურთიერთობები, მათ შორის იმ სახელმწიფოებთანაც, რომლებიც შესაძლოა, ერთმანეთთან იყვნენ დაპირისპირებულები. ეს ყველაფერი ეთიკის ჩარჩოებში უნდა ჯდებოდეს.

მაგალითად, სომხეთ-აზერბაიჯანის დაპირისპირებისას საქართველოს ნეიტრალური პოზიცია ეჭირა და ორივესთან პარტნიორული დამოკიდებულება ჰქონდა. ამიტომ ამ ქვეყნებისთვის გასაგები იყო, რომ საქართველოს მეზობლებთან მიმართებით სხვა არჩევანის გაკეთება არ შეეძლო.

ერთადერთი თემა აქ არის ის, თუ დამატებით რამდენად სწორად მოახერხებს სახელმწიფო ბალანსისა და ნეიტრალიტეტის პოლიტიკის გატარებას. მე რომ მკითხოთ, უნდა წასულიყო თუ არა ყაველაშვილი ირანში – დიახ, უნდა წასულიყო და ეს სწორი გადაწყვეტილებაა. ფაშინიანი, რომელიც ახლა ევროკავშირთან იწყებს ურთიერთობას, ამერიკასთან ალაგებს გარკვეულ საკითხებს და ტრამპთანაც კი ლამის მეგობრული ურთიერთობის რეჟიმშია, მაინც მიდის ამ დაკრძალვაზე. ამიტომ საქართველოსაც თავისი სახელმწიფოებრივი ინტერესები გააჩნია..