დღევანდელი შეტევის შედეგად რუსები კიდევ უფრო მძიმე მდგომარეობაში აღმოჩნდნენ – გიორგი კობერიძე

– მიბმულ რუკაზე ჩანს უკრაინელთა სამხედრო ოპერაცია ხარკივის რაიონში. ყვითლადაა მონიშნული ყველა ის ტერიტორია, რომლის გათავისუფლებაც უკრაინელებმა ბოლო 6 დღეში შეძლეს. დღევანდელი შეტევის შედეგად რუსები კიდევ უფრო მძიმე მდგომარეობაში აღმოჩნდნენ. სავარაუდოა, რომ რამდენიმე დღეში ხარკივის შემოგარენი რუსული ნაწილებისაგან სრულად გაიწმინდება. საინტერესოა გამოთავისუფლებული უკრაინული ელიტური ნაწილები მდინარე სევერსკი დონეცს გადაკვეთს და რუსულ დაჯგუფებას გადაუკეტავს მომარაგების არხებს საზღვართან ახლოს თუ M03 გზას გაუყვება და უშუალოდ იზიუმის რუსულ დაჯგუფებას შეუქმნის საფრთხეს.

– გუშინ რუსებმა იზიუმის აღმოსავლეთიდან შეაღწიეს დონეცკისა და ლუგანსკის რაიონებში. მათ შორის შეძლეს და დაიკავეს ბილოჰოროვკას ნაწილი ლუგანსკისა და დონეცკის რაიონების საზღვართან. დღეს უკრაინელები კონტრშეტევაზე გადავიდნენ და გაწმინდეს დასახლება და უკუაგდეს რუსები დაჭაობებულ პოზიციებზე, სადაც საარტილერიო ცეცხლის შედეგად მათი უკანდახეული ნაწილები განადგურდა. რუსი სამხედროები მდინარის უკან გადალახვისას იქნა განეიტრალებული. ზოგადად, მსგავსი მოვლენა არ წარმოადგენს უცნაურობას, რადგან უკუქცევისას თუკი მდინარეა შენს უკან და თან სამხედრო ხიდებზე გიწევს გასვლა არტილერიის მუშაობის შემთხვევაში ამ ყველაფრის უკონტროლო ქაოსში გადაზრდა სრულიად შესაძლებელი ხდება.

– ლუგანსკის რაიონში უკრაინელების დამატებითი ნაწილები იქნა თავმოყრილი. მათ შორის გამყარდა სევეროდონეცკის შემოგარენის კონტროლი, სადაც ბოლო დღეების განმავლობაში რუსები ძალიან აქტიურობენ. დამატებითმა უკრაინულმა დანაყოფებმა შეძლეს და ქალაქის ირგვლივ რამდენიმე სოფელი გაწმინდეს კიდეც. თუმცა ეს არ ჰგავს კონტრშეტევას, უფრო თავდაცვის პოზიციების გამაგრებასა და მოწინააღმდეგის საცეცხლე პოზიციების განეიტრალებას ემსახურება.

– დღეს კრემლმა, როგორც ჩვენთვის მოსალოდნელი იყო მობილიზაცია არ გამოაცხადა. რა თქმა უნდა მობილიზაცია იქნებოდა ის კრიტიკული წერტილი, რაც მოსკოვის მდგომარეობას კიდევ უფრო დაამძიმებდა. ათიათასობით გამოუცდელი თუ ნახევრად გამოცდილი ადამიანი, რომელსაც ვერ ექნებოდა ლოჯისტიკური გამართული ზურგი და ამასთან იდგებოდა იარაღის ქვეშ – პირველ რიგში რეჟიმისათვის შეიძლება აღმოჩენილიყო საფრთხე. და ასეც რომ არ იყოს, ომის გამოცხადება (რომლის გარეშეც მობილიზაცია ვერ მოხდებოდა) თავისსავე მოსახლეობაში ვაბანკზე წასვლას გულისხმობდა, რაც ნებისმიერი რეალობის დადგომის შემთხვევაში სწორედ კრემლს გახდიდა პასუხისმგებელს უბრალო რუსის თვალშიც კი. ახლა კი ტერმინი “სპეცოპერაცია” მოსკოვს მოქმედების უფრო ფართო შესაძლებლობას აძლევს და დამარცხების შემთხვევაშიც ადვილად შეასყიდებს საკუთარ მოსახლეობას, როგორც ოპერაციის უბრალო დასასრულს.

– პრეზიდენტმა ბაიდენმა ხელი მოაწერა უკრაინის ლენდ-ლიზის აქტს. ამიერიდან იარაღი არამხოლოდ რეზერვებიდან შევა უკრაინაში, არამედ მისთვის იწარმოებს კიდეც.”