დასჯადი ჟესტიკულაცია – რა (ვერ) დაამოწმა პროკურატურის “მოწმემ” პროცესზე? – ბადრი ჯაფარიძე

“ლელო – ძლიერი საქართველოს” ერთ-ერთი ლიდერის, ბადრი ჯაფარიძის განცხადებით, მოწმე პოლიციელმა მთელი სხდომის განმავლობაში მხოლოდ “ჟესტიკულაციებსა და მიმიკებზე” ისაუბრა.

ჯაფარიძე ამბობს, რომ მოწმე ივანე მაქაცარიამ ვერ თქვა, თუ რომელი პოლიტიკური ლიდერი სად იმყოფებოდა აქციაზე, ვერ დაასახელა ასევე ვის რა ეცვა და ვერც ზუსტი დრო გაიხსენა – თქვა მხოლოდ ის, რომ “თურმე პოლიტიკური ლიდერები ჟესტიკულაციით მოუწოდებდნენ ადამიანებს პარლამენტში შეჭრისკენ”.

ის, რაც დღეს ვნახეთ, ამის გადმოცემაც კი ძნელია. პოლიციელს ვუსმენდით ოთხი საათის განმავლობაში, რომელიც, პრაქტიკულად, არის მთავარი მოწმე და რომელმაც თქვა, რომ თურმე პოლიტიკური ლიდერები ჟესტიკულაციით მოუწოდებდნენ ადამიანებს პარლამენტში შეჭრისკენ. ოღონდ, ჟესტიკულაცია ვერ გაიმეორა, არ ახსოვს, მაგალითად, მე რა მეცვა, არ ახსოვს დღე, არ ახსოვს საათი, არ ახსოვს, სად ვიდექი… ასეთი მოწმე იყო დღეს, ამაზე კომენტარიც კი ზედმეტია.

სამწუხაროდ, თქვენ მოკლებული ხართ შესაძლებლობებს, ეს ყველაფერი გადაიღოთ და ნახოთ, მაგრამ საბედნიეროდ, ეს ყველაფერი იწერება და ინახება და იმის შესაძლებლობა ექნება საზოგადოებას, რომ შემდგომ ნახოს, რასთანაც გვაქვს საქმე.

ჩვენ რომ გვყავდეს დამოუკიდებელი სასამართლო, დღეს ეს პროცესი არ გაიმართებოდა იმიტომ, რომ არანაირი საფუძველი არ არსებობს სასამართლო პროცესისთვის. ეს არის წარმოუდგენლად ფალსიფიცირებული საქმე. ჩვენ ვხედავთ, რომ პროცესი დაჩქარებული ტემპით გრძელდება და ეს თავისთავად საუბრობს ყველაფერზე“, – განაცხადა ბადრი ჯაფარიძემ.

ვის რას ედავება პროკურატურა: 

• მიხეილ სააკაშვილი – ბრალდება წარედგინება საქართველოს სისხლის სამართლის კოდექსის 317-ე მუხლით – საქართველოს კონსტიტუციური წყობილების ძალადობით შეცვლისაკენ ან სახელმწიფო ხელისუფლების დამხობისაკენ მოწოდება. სააკაშვილს 3 წლამდე პატიმრობა ემუქრება.
• ზურაბ ჯაფარიძე ბრალდება წარედგინებათ საქართველოს სისხლის სამართლის კოდექსის 318-ე მუხლის პირველი ნაწილით და 319-ე მუხლით – საბოტაჟი და უცხო ქვეყნისათვის მტრულ საქმიანობაში დახმარება. 7-დან 15 წლამდე პატიმრობა ემუქრება.
•  გიორგი ვაშაძე – ბრალდება წარედგინებათ საქართველოს სისხლის სამართლის კოდექსის 318-ე მუხლის პირველი ნაწილით და 319-ე მუხლით – საბოტაჟი და უცხო ქვეყნისათვის მტრულ საქმიანობაში დახმარება. ვაშაძეს 7-დან 15 წლამდე პატიმრობა ემუქრება. 
• ელენე ხოშტარია – ბრალდება წარედგინება საქართველოს სისხლის სამართლის კოდექსის 318-ე მუხლის პირველი ნაწილით, 319-ე მუხლით და 321-ე პრიმა მუხლის პირველი ნაწილით – საბოტაჟი, აღნიშნული დანაშაულისთვის მატერიალური რესურსების მიწოდება და უცხო ქვეყნისათვის მტრულ საქმიანობაში დახმარება. ხოშტარიას 7-დან 15 წლამდე პატიმრობა ემუქრება.
• ნიკა გვარამია, ნიკა მელია, მამუკა ხაზარაძე და ბადრი ჯაფარიძე – ბრალდება წარედგინებათ საქართველოს სისხლის სამართლის კოდექსის 318-ე მუხლის პირველი ნაწილით – საბოტაჟი. ბრალსი დამტკიცების შემთხვევაში ოთხივე პოლიტიკოსს 2-დან 4 წლამდე პატიმრობა ემუქრება.