“ჩემი პროგნოზი კვლავ ასპროცენტიანი სიზუსტით ხდება” – რომან გოცირიძე

ყოფილი პარლამენტარი, რომან გოცირიძე:

ყველაზე დიდი კრიტიკა ჩემს პროგნოზში ბრაზილიისა და გერმანიის მოსალოდნელმა გავარდნამ გამოიწვია. არადა, თუ შემადგენლობებსა და მათ წინა თამაშების ხარისხს გადავხედავთ, სრულიად შესაძლებელი იყო იმის ვარაუდი, რაც მოხდა.

რა განასხვავებს ადრეულ სტადიაზე გავარდნილ ამ სამ გუნდს ფავორიტებისაგან? მათ არ ჰყავთ მსოფლიო დონის მოთამაშე ან მოთამაშეები. ბრაზილია გამონაკლისია ვინისიუსის სახით, მაგრამ ეს საკმარისი არ აღმოჩნდა. ვინ შეიძლება ჩაითვალოს მსოფლიო დონის მოთამაშედ? ვისაც დღევანდელი გადმოსახედიდან აქვს „ოქროს ბურთის“ მოპოვების პოტენციალი. ასეთები ამჟამად საფრანგეთის, ესპანეთის, არგენტინის, ინგლისის, პორტუგალიისა და ნორვეგიის გუნდებში არიან. სხვათა შორის, საქართველოს ნაკრებშიც.

ეს ფაქტორი, რა თქმა უნდა, გადამწყვეტი არ არის-ბევრჯერ მომხდარა, რომ ძლიერი ფეხბურთელებით, თუმცა გამორჩეული ვარსკვლავის გარეშე დაკომპლექტებული გუნდი ჩემპიონი გამხდარა. თუმცა, რაღაც მომენტში, სწორედ ამ ფაქტორის ხარჯზე გადის გუნდი ფონს. ასე მოხდა ამ ჩემპიონატზეც, წინა ტურში ინგლისის შემთხვევაში, როცა ცუდად მოთამაშე გუნდი ჰარი კეინის ორმა გოლმა გადაარჩინა.

თუ თავიდან სკეპტიკურად უყურებდნენ ჩემს პროგნოზს, ახლა უკვე მწერენ, ფსონი უნდა დავდო და მითხარი, ვინ მოიგებსო. ვპასუხობ-თავიდანვე უნდა გენახა რა დავწერე და გაიგებდი-მეთქი. ეს ხუმრობით, რა თქმა უნდა.