ჩეხეთში პრაღის ვაცლასის მოედანზე ათასობით მოქალაქე კორონავირუსის შეზღუდვების გასაპროტესტებლად შეიკრიბა, – ამის შესახებ Reuters-ი იუწყება.
პროტესტის მონაწილეები დროშებს აფრიალებდნენ და კორონავირუსის შეზღუდვების საწინააღმდეგო ლოზუნგებს სკანდირებდნენ.
მომიტინგეები, ძირითადად, არავაქცინირებულებისთვის დაწესებულ უფრო მკაცრ შეზღუდვებს, მათ შორის რესტორნებში ჭამის აკრძალვას, აპროტესტებდნენ.
„სახელმწიფომ უნდა მოუსმინოს ხალხის მოთხოვნებს. შეზღუდვები ჯოჯოხეთის გზაზე მიგვიყვანს“, – განაცხადა აქციის ერთ-ერთმა მონაწილემ.
მიუხედავად ინფიცირებულთა მზარდი რიცხვისა, ჩეხეთის მთავრობამ სხვადასხვა უწყებების თანამშრომლებისა და 60 წელს გადაცილებული პირების სავალდებულო ვაქცინაციის დადგენილება გააუქმა. გარდა ამისა, შემცირდა კარანტინისა და იზოლაციის დროებიც, თუმცა აუცრელებისთვის გარკვეულ დაწესებულებებში შესვლის შეზღუდვა კვლავ ძალაში დარჩა.
კომენტარები