საქმეების გარჩევა “ქურდული” წესებით – ამ წუთებში საქალაქო სასამართლოში ბრალდებული 10 პირის პროცესი მიდმინარეობს. აღკვეთის ღონისძიების შეფარდებაზე მოსამართლე დავით კურტანიძე მსჯელობს.
ამავე მოსამართლემ უნდა იმსჯელოს კიდევ 10 პირიან საქმეზე. სწორედ ამ ეპიზოდშია 35 წლამდე ლალო გველესიანი, რომელიც 29 დაკავებულიდან ერთადერთი ქალია. დღეს ამავე ეპიზოდზე სასამართლოში მიიყვანენ ფრანგული გასაჭიმი ჭერის ხელოსანსაც.
აღნიშნულ საქმეზე 9 პირს წინასწარი პატიმრობა გუშინ უკვე შეეფარდა.
“სასამართლომ გაიზიარა ბრალდების მხარის შუამდგომლობა და 9 ბრალდებულს “ქურდული სამყაროს” საქმიანობის განხორციელებისთვის, აღკვეთის ღონისძიების სახით, პატიმრობა შეუფარდა. ბრალდების მხარეს წარმოდგენილი ჰქონდა მტკიცებულებათა ერთობლიობა, რაც ადასტურებდა, რომ ბრალდებულები ახორციელებდნენ “ქურდული სამყაროს” საქმიანობას. ერთ-ერთი მათგანი აწყობდა ქურდულ გარჩევებს, მოდავე მხარეებს უკავშირდებოდა “ქურდული სამყაროს” საქმიანობის მხარდამჭერების მეშვეობით, რის შემდეგაც, “ქურდული” გარჩევის გზით, იმ პირს, რომელსაც გაამტყუნებდა, მატერიალური სარგებლის გადახდას აიძულებდა,” – აღნიშნა პროკურორმა, ვაჟა თოდუამ.
საქმე ეხება მასშტაბურ სპეცოპერაციას, რომლის ფარგლებშიც ბრალი სულ 32 პირს წარედგინა – მათგან 29 დაკავებულია, გამოძიების ინფორმაციით, ბრალდებულები სისტემატურად აწყობდნენ “ქურდულ გარჩევებს”, დაუმორჩილებლობის შემთხვევაში კი, მოქალაქეებს ფიზიკური ანგარიშსწორებითა და სიცოცხლის მოსპობით ემუქრებოდნენ.
კომენტარები