“ავადმყოფები, გიჟები, ნაძირლები, ბოროტები, მოძალადეები” – ტრამპი ირანის ხელისუფლებაზე

აშშ-ის პრეზიდენტმა, დონალდ ტრამპმა ანკარაში, ნატო-ს გენერალურ მდივან მარკ რუტესთან შეხვედრაზე განაცხადა, რომ ირანთან საქმის დაჭერა აღარ სურს და თქვა:

ჩვენ ძალიან მძლავრად დავარტყით წუხელ, ძალიან საშიშ ადამიანებს ირანიდან. ისინი ავადმყოფები არიან, მათ რაღაც სჭირთ. ჩვენ ვაგრძელებდით  თქვენ იცით, საწვავის და მსგავსი რაღაცების მიწოდებას, მათ კი ამის ნაცვლად გუშინ გემებს რაკეტები დაუშინეს. ხოდა, ჩვენ მათ წუხელ ძალიან მაგრად დავარტყით, ძალიან მაგრად. ვიტყოდი, 20-ჯერ უფრო მაგრად. მე მათ ვუთხარი, რომ ყოველ ჯერზე, როცა თქვენ დაგვარტყამთ, ჩვენც დაგარტყამთ. და, რა თქმა უნდა, ისინი ბინძური მოთამაშეები არიან. ისინი ნაძირლების ბრბოა.  მე ისინი არ მომწონს. ისინი ბოროტი ხალხია. და ეს ეხება ირანის დენუკლეარიზაციას. ჩვენ მათ ბირთვულ იარაღს ავართმევთ, ჩვენ ამის საშუალებას არ მივცემთ, რადგან ისინი გიჟები არიან და არ შეიძლება ბირთვული იარაღი ჰქონდეთ.
ჩვენ მათთან ბევრი დრო დავკარგეთ. ვფიქრობ, უბრალოდ ჩვენი საქმე უნდა ვაკეთოთ. წარმოგიდგენიათ? მათ გუშინ ბომბების, უფრო სწორად, რაკეტების სროლა დაუწყეს გემებისთვის. საუდის არაბეთის, ქუვეითის და კიდევ რამდენიმე სხვისთვის. არ მგონია იცოდნენ, საერთოდ რას აკეთებენ, მაგრამ ცუდი ხალხია, სხვათა შორის, ვფიქრობ, რომ ისინი უნიათოები არიან. რადგან კომპეტენტურები რომ ყოფილიყვნენ, შეთანხმებას დიდი ხნის წინ დადებდნენ. მაგალითად, ასე 47 წლის წინ. ასე რომ, ისინი უკვე 47 წელია პრობლემას წარმოადგენენ. ისენი არიან ბოროტი, ავადმყოფი ადამიანები და ჩვენ უნდა მოვაშოროთ მათი კიბო. მათი კიბო. და იცით, კიბო ადრეულ სტადიაზევე უნდა ამოიჭრას. მე ასე ვფიქრობ.
ჩემი აზრით, ყველაფერი დასრულებულია. მე აღარ მსურს მათთან საქმის ქონა, ისინი ნაძირლები არიან. იცით, რა არის ნაძირალა? ისინი ნაძირლები არიან, ისინი ავადმყოფი ადამიანები არიან. მათ ავადმყოფი ადამიანები მართავენ. და ისინი სასტიკი, მოძალადე ხალხია. ბირთვული იარაღი რომ ჰქონდეთ, გამოიყენებდნენ კიდეც. ჩვენ ვდებთ შეთანხმებას… აი, მე რომ მასთან შეთანხმებას ვდებდე, ჩვენ გვაქვს შეთანხმება, ის გადის გარეთ და ლაპარაკობს. ჩვენ ვდებთ შეთანხმებას, ყველა თანხმდება: არანაირი ბირთვული იარაღი. ჩვენ ვდებთ შეთანხმებას, ისინი გადიან გარეთ, ელაპარაკებიან პრესას და ამბობენ: ჩვენ ამაზე არც კი გვისაუბრიაო. მათ რაღაც სჭირთ, ისინი გიჟები არიან”. – განაცხადა ტრამპმა. 

შეგახსენებთ, აშშ-მ ირანულ ნავთობზე სანქციები აღადგინა მას შემდეგ, რაც ირანი ჰორმუზის სრუტეში კომერციულ გემებს თავს დაესხა.

გამოცემა Axios-მა ამერიკელ ოფიციალურ პირებზე დაყრდნობით დაწერა, რომ ირანმა ჰორმუზის სრუტეში ტრანზიტით მიმავალ სავაჭრო გემებს, სულ მცირე, 2 რაკეტა ესროლა.

ამის შემდეგ, სამხედრო ძალებმა ირანის წინააღმდეგ იერიშების ახალი სერია დაიწყეს.