“ასე რომ არ მოქცეულიყავით დღეს დაზარალებული პოლიციელების ფოტოებით იქნებოდა გამოტენილი ყველაფერი…” – ნიკა მელია “ენმ”-ის გუნდს მადლობას უხდის

ციხეში მყოფი “ერთიანი ნაციონალური მოძრაობის” თავმჯდომარე, ნიკა მელია მის გუნდს მიმართავს, “მთავარი არხისთვის” მიცემული ინტერვიუთი:

“ვეტყვი იმას, რომ მეგონა რომ გიცნობდით და ყველაფერი ვიცოდი თქვენზე, მაგრამ ვცდებოდი. შეიძლება სუბიექტური ვარ, მაგრამ მაინც ვიტყვი, რომ თუ გინდა გყავდეს თანაგუნდელები და მეგობრები, აი ასეთები უნდა ინატრო, როგორებიც ნაციონალურ მოძრაობაში არიან. უდიდეს ვალში ვარ თითოეულ თქვენთაგანთან. მარტო მე კი არა, მთელი ქვეყანა. და არა მარტო ტანადგომისთვის და თავისუფლებისთვის დაუღალავი ბრძოლისთვის. იმისთვისაც, როგორც სპეცოპერაციისას მოიქეცით, არც ერთი ნაბიჯით რომ არ გადაუხვიეთ მშვიდობიანი წინააღმდეგობის გეგმას და არ მიეცით პროვოკაციის შესაძლებლობა სწორედაც რომ პროვოკაციისთვის მოსულებს.

სხვაგვარად რომ მოქცეულიყო ერთერთი ჩვენთაგანი მაინც, დღეს ეს საერთაშორისო შტურმი კი არ იქნებოდა, დაზარალებული პოლიციელების ფოტოებით და კადრებით იქნებოდა გამოტენილი ყველაფერი და ელჩები მთავრობასთან ერთად მათ მოსანახულებლად ივლიდნენ. ახლა კი ჩვენ ვართ სრულიად გამარჯვებულები, ოცნება კატასტროფულ ვითარებაში. მთავარია ახლა სრული მობილიზაცია და იმის რწმენა, რომ გამარჯვება ერთი ხელის გაწვდენაზეა”