“არესტოვიჩი, დანილოვი, კულება, გონჩარენკო, ზელენსკიც ზოგჯერ ფსიქიატრიულის პაციენტებს ჰგვანან, მაგრამ ფაქტია, თვენახევარში კბილები ჩაუმტვრიეს რუსულ სამხედრო მანქანას…” – ოთარ ფანცულაია

მათ გაპრავებას არ ვაპირებ..

უბრალოდ სხვა მხრიდანაც შეიძლება მათი პორტრეტის დახატვა…

უნდა ვაღიაროთ, რომ მხოლოდ ასეთი ცხელთავიანი გიჟების გუნდი გაბედავდა რუსეთთან პირისპირ შებრძოლებას.. მხოლოდ მათნაირი გიჟების ხელით იყო შესაძლებელი რუსული ფაშიზმისთვის ჭკუის სწავლება.

ჩემნაირი საუკუნით ადრე დაიწყებდა ეკონომიკის, პოლიტიკური და სამართლებრივი სისტემის დალაგებას, ჯარის სათანადო კონდიციებამდე მომზადებას, მოქნილი, პროაქტიული და მიზანმიმართული პოლიტიკით ეცდებოდა საწადელის მიღწევას, წინ დავიყენებდი ვეფხვებს და იმათ შევაჭმევინებდი ტურტლიან დათვს..

მათ სხვა გზა აირჩიეს, გიჟური, აუხსნელი, ანტიპოლიტიკური, ანტიმეცნიერული, მაგრამ ფაქტია, რომ მათ შეძლეს უკრაინელი ერის და ცივილიზებული სამყაროს მობილიზება რუსეთის წინააღმდეგ… ფაქტია, რომ ამ თვენახევარში კბილები ჩაუმტვრიეს რუსულ სამხედრო მანქანას.. ახლა რუსები უკრაინელთა შემჩერებლები აღარ არიან.

რა სისულელეც არ უნდა წამოროშონ დღეს, თუკი ომს საბოლოო გამარჯვებამდე მიიყვანენ, ისინი ხვალ ნამდვილ გმირებად იქცევიან. მერე კი ვიტყვით – მართლები ყოფილან! როგორ შეიძლება ამდენჯერ შეცდე და რუსეთს ომი მოუგო? ხომ წარმოუდგენელია? თანაც – გამარჯვებულებს არ ასამართლებენ!

აგერ, აშშ-ს სენატმა დაამტკიცა კანონპროექტი ლენდ-ლიზის შესახებ, რითაც ფაქტობრივად ომში ღიად ჩაერთო! აქ ბაფეტის სიტყვები მახსენდება – “არასოდეს დადოთ ფსონი აშშ-ს წინააღმდეგ!”.

ისტორიას უყვარს გმირები, ისეთები, როგორებიც აზოვის ბატალიონის ბიჭები არიან.. ისინიც გიჟები არიან.. დღეს მათი სისხლით უკრაინა თანამედროვე ისტორიას წერს.. რუსული ფაშიზმის მარცხის ისტორიას.”