“ამისთვის ვისჯები” – რა თქვა გიორგი უძილაურმა სასამართლოზე

თბილისის საქალაქო სასამართლოში დღევანდელ პროცესს ჯაშუშობის ბრალდებით დაკავებული გიორგი უძილაურიც ესწრებოდა.

ფინანსური პოლიციის მაღალჩინოსანი და წარსულში “ქართუ ჯგუფის” საზოგადოებასთან ურთიერთობის სამსახურის ყოფილი უფროსი დღევანდელ სხდომაზე ამბობდა, რომ ის ევროკავშირის მხარდაჭერისთვის ისჯება.

გიორგი უძილაურის თქმით, ჯაშუში არ არის არც გულბაათ რცხილაძე. ადვოკატის, ბექა გულედანის ცნობით, მისი დაცვის ქვეშ მყოფმა აღნიშნა, რომ გულბაათ რცხილაძე უბრალოდ პრორუსია და მისი დაკავებით სახელმწიფომ პარიტეტი დაიცვა, “ვითომდა რუსეთის აგენტურასაც ვებრძვითო”.

ამასთან გიორგი უძილაურმა აღნიშნა, რომ დღეს საქართველოში ევროპეიზმი ისეთივე დასჯადია, როგორც “ფაშისტური გერმანიის დროს ებრაელობა”.

ბრალდებულის პოზიცია უცვლელია, არ ცნობს თავს დამნაშავედ. დღეს სასამართლო სხდომაზე გააჟღერა რომ ვიღაც გიორგი უძილაური კი არ ისჯება, ისჯება ევროკავშირი. ასევე თქვა, რომ გულბაათ რცხილაძეც არ არისო ჯაშუშიო, ის უბრალოდ პრო-რუსიაო და პარიტეტი დაიცვაო სახელმწიფომ იმისთვის, რომ ვითომდა რუსეთის აგენტურასაც ვებრძვითო. თქვა, რომ ევროპეიზმი დღეს საქართველოში ისეთივე დასჯადია, როგორც ფაშისტური გერმანიის დროს ებრაელობა. ეს პოზიცია დააფიქსირა გიორგი უძილაურმა. 

ჩვენ მოვითხოვეთ აღკვეთი ღონისძიების გაუქმება, აღკვეთი ღონისძიების გარეშე დატოვება და ასევე საქმის შეწყვეტა, ვინაიდან არ იყო მტკიცებულებების ის სტანდარტი, რომელიც შესაძლებელია საქმის არსებით განსახილველად გადაცემას დაედოს საფუძვლად. სასამართლომ არ გაიზიარა აღნიშნული და საქმე გადაეცა არსებითი განხილვისთვის,” – ამბობს ადვოკატი ბექა გულედანი. 

ცნობისთვის, მოსამართლე ლელა კალიჩენკომ ჯაშუშობის ბრალდებით დაკავებული გიორგი უძილაური აღკვეთის ღონისძიების სახით პატიმრობაში დატოვა.

შეგახსენებთ, რომ საქმეს გრიფი ადევს, შესაბამისად პროცესები დახურულია.

გიორგი უძილაურს ბრალდება საქართველოს სისხლის სამართლის კოდექსის 314-ე მუხლის პირველი ნაწილით (ჯაშუშობა) აქვს წარდგენილი.

ბრალის დამტკიცების შემთხვევაში, მაღალჩინოსანს 12 წლამდე პატიმრობა ემუქრება.