ანი დვალიშვილი
6 სექტემბერს, პარლამენტი საშემოდგომო სესიას იწყებს. უმრავლესობის წევრები უკვე გააფრთხილეს, რომ ამ დროისთვის, ყველა საქმე მოლეული უნდა ჰქონდეთ და პარლამენტში ასპროცენტიანი დასწრება უნდა იყოს, რადგან ოპოზიცია ცხელ სესიებს აანონსებს. ის, რომ ოპოზიციას როგორც ამერიკელი, ისე ევროპელი პარტნიორების სრული მხარდაჭერა ექნება, აქედანვე ცხადია. ამერიკის ელჩის მიმართ არსებულ პრეტენზიებს თავი რომ დავანებოთ, აგერ, ვენეციის კომისიამაც დაიწუნა სასწრაფო წესით მიღებული კანონპროექტები. თუმცა, ამის გარდა, ოპოზიციას სახალხო დამცველთან და საარჩევნო სისტემასთან დაკავშირებითაც აქვს სერიოზული საჭიდაო. რეალურად, ორივე მხარემ იცის, რომ ზამთარში არანაირ სტატუსს არ მოგვცემენ, რადგან 12-პუნქტიანი გეგმა ვერ თუ არ შესრულდება. ამიტომ, ოპოზიციის მიზანია, სწორედ ზამთრამდე, ბოლომდე აწიოს დუღილის ტემპერატურა და თუ იმდენს მოახერხებენ, რომ ქუაჩაში კვლავ გამოვა 30 ათასი ადამიანი, უკვე სხვა ლიდერები გამოვლენ ასპარეზზე და ოდიოზურ ფიგურებს გულმოდგინედ გადამალავენ. ამის შესახებ ოპოზიციაში ყველამ იცის, ეს არის დასავლეთის მთხოვნა, თუმცა არავინ იცის, ვინ იქნება ის სხვა. პოლიტიკურ ჰორიზონტზე ჯერჯერობით არავინ ჩანს, მაგრამ ოპოზიციის კულუარებში ამბობენ, დასავლეთი ახალ სახეს და პარტიას ამზადებს იმისთვის, რათა „ოცნება“ რომ ჩაანაცვლოსო. რამდენად შეეგუება ოპოზიცია ამ სიახლეს, ძნელი სათქმელია, მაგრამ მათ რესურსი უბრალოდ აღარ აქვთ და აგერ, ნაციონალური მოძრაობის მთავარი იმედი, მიხეილ სააკაშვილი საქართველოზე საერთოდ აღარ საუბრობს და ყველაფერს აკეთებენ, მის საზღვარგარეთ გასაყვანად. უკვე მეორედ მოხდა, როცა მიშამ ციხიდან წერილი აფრინა და მხოლოდ უკრაინაზე გააკეთა აქცენტი, საქართველოში მიმდინარე პროცესები კი არც უხსენებია.
კომენტარები