„ამერიკის ხელისუფლება სერიოზულად განიხილავს ამ ჭურვების უკრაინისთვის გადაცემას, თუ დაბომბავენ რუსეთის ტერიტორიას, ჯანდაბას, დაბომბონო“ – სოსო ცინცაძე

ლევან ჯავახიშვილი

„ალიას“ ესაუბრება ექსპერტი, სოსო ცინცაძე.

– ზელენსკიმ ნატო-ს მიმართა და მოსთხოვა, დაჩქარებული პროცედურებით მიგვიღეთ ორგანიზაციში, როგორც შვედეთისა და ფინეთის მიღებას აპირებთო…

– ზელენსკიმ იცის, ნატო-ში ვერ მიიღებენ და ამ განცხადებით ცდილობს, მაქსიმუმი მიიღოს ნატო-სგან, გაიორმაგოს თუ გაისამმაგოს ის დახმარებები, რასაც ნატო უწევს. არ გამოვრიცხავ, რომ ამ ეტაპზე უკრაინას ნატო-მ მისცეს ნატო-ს არაწევრი მოკავშირის სტატუსი, რომელიც 8 ქვეყნას აქვს, სამხრეთ კორეას, იაპონიას,ისრაელს და სხვებს. ეს სტატუსი თავისთავად გაზრდის უკრაინისთვის ნატო-ს ყველა სახის დახმარებას. ზელენსკი სულელი არ არის, მშვენივრად იცის, ნატო-ში რომ არ მიიღებენ და ბოლოს, ვფიქრობ, იტყვის, წევრად თუ არ გვიღებთ, მოკავშირის სტატუსი მოგვეცითო და შესაძლოა, მისცენ კიდეც.  მოკლედ, ზელენსკის ნატო-სგან მეტი სამხედრო და სხვა სახის დახმარება უნდა და  ამ დახმარებას გაუზრდიან. აგერ, ნატო-ს გენმდივანი, იენს სტოლტენბერგი გამოვიდა და თქვა, უკრაინას იმდენს და იქამდე გავუწევთ სამხედრო დახმარებას, რამდენიც და სადამდეც დასჭირდებაო. თითქმის იგივე თქვა ჯო ბაიდენმა. 1-ელ  ოქტომბერს უკვე „ლენდ ლიზის“ პროგრამა ამუშავდა.  გაწერილი გეგმით, კონკრეტულ ვადებში  უკრაინა მიიღებს საუკეთესო ამერიკულ იარაღს. არ გამოვრიცხავ, „სტელსის“ ტიპის ბომბდამშენებიც გადასცენ, არის მაგაზე ლაპარაკი. ამერიკამ უკვე გამოყო  1.2 მილიარდი დოლარი და მწარმოებელს შეუკვეთა 18 ერთეული „ჰაიმერსი“, მაგრამ ამას მინიმუმ 6 თვე დასჭირდება. მერე, უნდა გამოსცადონ ყველა და ისე გადასცენ  უკრაინას. ეს, სადღაც გაზაფხულისთვის მიეწოდება უკრაინას. თუმცა, შესაძლოა, რამდენიმე ერთეული „ჰაიმერსი“ ამერიკამ მანამდე გადასცეს, ვიდრე ეს შეკვეთა დასრულდება. ახლა 16 „ჰაიმერსი“ აქვს უკრაინას, ამათაც რომ გადასცემენ, 34 ექნება და ეს უკვე სერიოზული საქმეა. თან, ამერიკა არ მბობს, რომ ეს  18 „ჰაიმერსი“ ბოლო იქნება უკრაინისთვის. ცოტა ხანში შეიძლება, 50 ერთეული შუკვეთოს ამერიკის თავდაცვის სამინისტრომ მწარმოებელ კომპანიას. ცხადია, მთავარი მაინც „ჰაიმერსის“ შორსმსროლელი ჭურვებია, რომლებიც 250- 300 მეტრზე და უფრო შორსაც ანადგურებენ სამიზნეს. ამერიკა თავს იკავებდა, ამ ჭურვების უკრაინელებისთვის გადაცემაზე, რუსეთის ტერიტორიებს დაბომბავენ და შარში გაგვხვევენო. ახლა ამერიკის ხელისუფლება სერიოზულად განიხილავს ამ ჭურვების უკრაინისთვის გადაცემას, თუ დაბომბავენ რუსეთის ტერიტორიას, ჯანდაბას, დაბომბონო – საერთო პოზიციაზე არიან ამერიკელი პოლიტიკოსები და გენერალიტეტი. ესეც პუტინის გაუთვლელი გადაწყვეტილების შედეგია, უკრაინის ტერიტორიების ანექსიამ შეცვლა ამერიკელების შედარებით ფრთხილი მიდგომა ამ საკითხისადმი. ასევე, ამერიკა აპირებს უკრაინას გადასცეს სახმელეთო შეტევის, შორი მოქმედების, ფრთოსანი რაკეტები, „ტომაჰავკები“. იმდენად ზუსტი შეტევითი იარაღია, რომ მასზე მოსწრებულად ამბობენ, ქირურგიული სიზუსტე აქვსო. არ გამოვრიცხავ, „ლენდ ლიზის“ პროგრამითაც გაუგზავნონ უკრაინელებს „ტომაჰავკები“. ამერიკა 30 წელია უშვებს „ტომაჰავკებს“ და ასაწყობებს, ძალიან ბევრი აქვს. უკვე შეიძლება ვთქვათ, რომ უკრაინის დახმარება გაიზრდება და ომი გაჭიანურდება. რეალურად, პუტინმა არაფერი არ მოიგო, მარტო რეიტინგი შეინარჩუნა და იმ ხალხის გული მოიგო, რომლებიც რუსეთის ყველა ომს და უჭერენ მხარს, ვისთვისაც რუსეთის მიერ სხვა ქვეყნების ტერიტორიების დაპყრობაზე დიდი ბედნიერება არ არსებობს. ესენი არიან ბრმა პატრიოტები, რომლებიც ვერ ხვდებიან, რომ ახლო პერსპექტივაში რუსეთს სერიოზული ეკონომიკური პრობლემები ექნება, ვეღარც ჯარს შეინახავს, ვეღარც იმ იარაღს აწარმოებს, რომელსაც სანქციების მერე მაინც აწარმოებდა და აღარც სერიოზული იარაღის საყიდელი ფული ექნება. დარჩება მარტო ტანკები, „კალაშნიკოვის“ ავტომატები და ატომური ბომბები, ეგენი ბევრი აქვს. ნუ, რა გითხრა, აბა?  ვლადიმერ ჟირინოვსკის მთელი 30 წელი სტაბილურად 6 მილიონი ამომრჩეველი ჰყავდა რუსეთში, ეს კლოუნი პატიოსნად ღებულობდა ყველა არჩევნებზე 6 მილიონ ხმას. აი, ეგეთი უცნაური ხალხია რუსები და აქედან გამომდინარე, გაითვალისწინე რა ქვეყანაა.