„ლელოს“ ლიდერმა, მამუკა ხაზარაძემ ჟურნალისტებს განუცხადა:
„ყოველგვარი მსგავსი შეფასებისგან თავს შევიკავებ. შეიძლება ჩვენთვისაც არ არის ბევრი რამ მისაღები, მაგრამ ეს უნდა გადაწყდეს ძალიან წყნარი საუბრის და დიალოგის პირობებში. ყველანაირი მსგავსი თემების გამოტანა, რომელიც აზიანებს პროცესს, ჩვენთვის მიუღებელია და ყველას კიდევ ერთხელ მოვუწოდებ, ნუ აჰყვებით ასეთ პროვოკაციას, რადგან საბოლოო ჯამში, „გაიმარჯვებს“ „ქართული ოცნება“, მარტო დაისაკუთრებს პარლამენტს და შეეცდება, რამდენიმე ადამიანი შეიყვანოს პარლამენტში, რათა „გაიპრავოს“ ის გაყალბებული არჩევნები, რომელიც საქართველოს არა წინვლას, არამედ უკუსვლას მოუტანს.
მინდა კიდევ ერთხელ დავაფიქსირო ჩემი და „ლელოს“ პოზიცია. პირველ რიგში, მადლობას ვუხდით ჩვენს საერთაშორისო პარტნიორებს, კერძოდ ამერიკის ელჩს საქართველოში და ევროკავშირის ელჩს საქართველოში. მათი ძალიან დიდი ძალისხმევით და ენერგიით ხდება გზების მოძებნა და ის ფასილიტაცია, რომელიც დღეს მიმდინარეობს. ყველანაირი თავდასხმა ჩვენი სტრატეგიული პარტნიორების წარმომადგენლებზე არის მიუღებელი და ესეც ძალიან სერიოზულად აზიანებს ამ პროცესს. ამიტომ, აქაც კიდევ ერთხელ მოვუწოდებ ყველას, თავი შეიკავონ მსგავსი გამონათქვამებისგან და თავდასხმებისაგან, რამეთუ ჩვენ ყველამ ერთად უნდა ვიპოვოთ გზა, რომ საქართველო დაადგეს ნორმალურ განვითარებას“
კომენტარები