კონსტიტუციონალისტი, ვახუშტი მენაბდე:
სხვლა ჩემთვის, ალბათ, ვენახთან ურთიერთობის ყველაზე საინტერესო მომენტია, მაგრამ ყველაზე სევდიანიც.
აი, რატომ:ევოლუციის შედეგად ვაზს (Vitis) ორი ბუნებრივი ინსტინქტი განუვითარდა: ზრდა და გამრავლება.ვაზი ხვიარაა, მზისკენ მიცოცავს, სინათლეს ეძებს, რომ უკეთ განვითარდეს. ამაში მიდი ენერგიის ერთი დიდი ნაწილი და ამას ხმარდება ის რესურსი, რასაც მიწიდან, თუ გარემოდან იღებს.გამრავლების საქმეზე, ანუ ნაყოფზე, ანუ ყურძენზე იხარჯება მეორე ნაწილი. თუმცა გასაგებია, რომ გამრავლების პრიორიტეტს იმდენი მარცვალი არ სჭირდება, რამდენიც ღვინოს.ზუსტად აქ შემოდის ადამიანი. გასხვლისას ჩვენ ვცდილობთ, პირველი ინსტინქტი დავჩაგროთ, მცენარეს არ მივცეთ ზრდის საშუალება და ის რესურსები, რომელიც ამ მიმართულებით უნდა წასულიყო, ნაყოფის ხარისხის გასაუმჯობესებლად გამოვიყენოთ.გასხვლას მეორე ამოცანაც აქვს: შტოების მოჭრით მცენარეს სტრესში ვაგდებთ, ხელოვნურ ხიფათს ვუქმნით, რომ გამრავლებაზე იზრუნოს (ევოლუციურად საფრთხის დროს ყველა არსება სახეობის გადარჩენაზე იწყებს ზრუნვას), ანუ იმაზე მეტი ნაყოფი მოისხას, ვიდრე ნორმალურ მდგომარეობაში.ამ არც თუ ისე ჰუმანური გზით ვაღწევთ მევენახეობაში ორ ძირითად მიზანს: ნაყოფიერებასა და ხარისხს.სხვლას ბუნებრივად მოყვება ჭრილობის ქვევით ჩახმობა, ეს ფაქტორი სწორად ჩატარებული ოპერაციების დროს შეგვიძლია შევამციროთ, მაგრამ ნულამდე ვერასოდეს დავიყვანთ. ადრე თუ გვიან ეს ჯერ ვაზის ნაყოფიერების შემცირებას, საბოლოოდ კი, გახმობას გამოიწვევს. ჩვენ ამ ბოლო ნაწილს, ალბათ, არც დაველოდებით – როცა შევატყობთ, ინდივიდი დაბერდა, ჩვენივე ხელით მოვჭრით და მის ადგილას ახალს დავრგავთ.სინამდვილეში, ვაზი ბუნებრივ პირობებში რამდენიმე ასეული წელი ცოცხლობს, ზვრებში კი, მხოლოდ რამდენიმე ათეული. თქვენ გამოთვალეთ რამდენი პროცენტით ვუსწრაფავთ სიცოცხლეს მცენარეს იმისთვის, რომ მოსავალი მივიღოთ.ჩვენი წინაპრები ვაზს ხეზე უშვებდნენ და თითქმის არ სხლავდნენ (როგორც აღწერილია, რამდენიმე წელიწადში ერთხელ წალდით გადასხეპავდნენ მეტისმეტად გაზრდილ და გადმოკიდებულ რქებს), მოსავალსაც იმდენს იღებდნენ, წლიდან წლამდე ყოფნიდათ. ახლა ეს ვეღარ გამოვა.ამიტომ ერთადერთი ის შეგვიძლია, სათუთად მაინც გავსხლათ და გვახსოვდეს, რომ ჩვენს სიამოვნებას სიცოცხლის ფორმები ეწირება.
ფოტო ძველია. მენაბდის მარანი • Menabde Wineryს ვენახია შემოქმედში (გურია).
კომენტარები