ნიკა მელიას ადვოკატს კორონავირუსი დაუდასტურდა, ტემპერატურა დაუფიქსირდა მელიასაც?

ნიკა მელიას ადვოკატს, ბექა ბასილაიას კორონავირუსი დაუდასტურდა. ამის შესახებ მან სოციალურ ქსელში თავადვე დაწერა.

“გუშინ (22.04) გამომივლინდა სიმპტომი (ხველა), დღეს დილით (23.04) PSR-მა დადებითი აჩვენა. ორშაბათიდან ვისთანაც კონტაქტი მქონდა, მგონი ყველას პირადად შევატყობინე. როგორც ამიხსნეს, მცირე ალბათობით არის შანსი, რომ წინა კვირაშიც გადამდები ვყოფილიყავი.

სამწუხაროდ წინა კვირის კონტაქტებთან პირადად შეხმიანებას უბრალოდ ვერ შევძლებ (ჯერ ნიკას პროცესი იყო, შემდეგ გიო მუმლაძის) უამრავ ადამიანს შევხვდი და მივესალმე, თითქმის ყველანი სავარაუდოდ მეგობრებში მეყოლებით, ამიტომ ვდებ ამ პოსტს, ინფორმირებისთვის,” – წერს ბექა ბასილაია.

ამავე პოსტის კომენტარებით ცნობილი ხდება, რომ ტემპერატურა დაუფიქსირდა ციხეში მყოფ ნიკა მელიასაც. ადვოკატს ბოლოს მასთან შეხება პარასკევს ჰქონდა.

მოგვიანებით, პენიტენციურმა სისტემამ განმარტა, რომ გავრცელებული ინფორმაცია სიმართლეს არ შეესაბამება და ნიკა მელიას ტემპერატურის მატება არ აღენიშნება.