„ალიას“ ესაუბრება, პარტია „თავისუფალი საქართველოს“ თავმჯდომარე, კახა კუკავა.
– გოგი წულაია, ვიდრე დაიჭერდნენ, ცოტა ხნით ადრე წამივიდა „თავისუფალი საქართველოდან“. რატომ დატოვა პარტია? რაიმე კონფლიქტი ხომ არ მოხდა თქვენს შორის?
– რამდენიმე საკითხთან დაკავშირებით ჩვენ გვქონდა განსხვავებული შეხედულებები. ახლა ამაზე არ ვისაუბრებ, რადგან ჩვენ შევთანხმდით, რომ ამ საკითხებზე არ ვისაუბრებდით საჯაროდ. ძალზე ცივილიზებურად დავშორდით. არც ერთ საკითხზე არ გვიჩხუბია, არანაირი კონფლიქტი არ ყოფილა ჩვენს შორის. გოგის პარტიიდან წასვლას ჩვენს ურთიერთობაზე არ უმოქმედია. სამწუხაროა, რაც მას შეემთხვა, გოგის თავისი პოლიტიკური გეგმები ჰქონდა და იმედს ვიტოვებ, რომ გადალახავს ამ დაბრკოლებას და გააგრძელებს პოლიტიკურ საქმიანობას.
– გოგი წულაია ქალზე ძალადობის ბრალდებით არის დაჭერილი და რაც ინფორმაცია გავრცელდა ამ ფაქტის შესახებ, რა შთაბეჭდილება დაგრჩათ?
– ცალსახად მე ვერაფერს ვერ ვიტყვი. ზოგადად, ამ კატეგორიის, ქალზე ძალადობის საქმეზე ვიტყვი, როდესაც სახელმწიფო აპრიორი არის ქალის მხარეს, ეს არ არის სწორი და ეწინააღმდეგება მართლმსაჯულების პრინციპს. ჩვენში ქალზე ძალადობის საკითხები არის ძალიან პოლიტიზირებული. ქალზე ძალადობა დანაშაულია, მაგრამ ქალი თუ კაცს უჩივის, თუ აპრიორი არ არის კაცის დანაშაულის მტკიცებულებები, არ შეიძლება სახელმწიფომ ყოველთვის დაიჭიროს ქალის მხარე. ერთადერთი ჩამოყალიბებული პოზიცია რომელიც მაქვს, როგორც იურისტს, ის არის, რომ გოგის წინასწარი პატიმრობა დაუშვებელია. გოგი უნდა იყოს გარეთ და ჰქონდეს იმის საშუალება, საკუთარი სიმართლე დაუმტკიცოს საზოგადოებას, როგორც ასმათ დვალიშვილი ზის ტელევიზიებში და საკუთარ პოზიციას გამოხატავს, ამის საშუალება გოგისაც უნდა ჰქონდეს. კანონის მიხედვით, რაც წინასწარი პატიმრობის საფუძველია, გოგის შემთხვვაში სასაცილოც კი არის, არც ერთი საფუძველი მისთვის წინასწარი პატიმრობის შეფარდებისა, არ არსებობს. ჩვენთან ჩამოყალიბდა ასეთი პრაქტიკა, რომ ქალზე ძალადობის ყველა შემთხვევაში გამოიყენება საპატიმრო ღონისძიება, რაც ცალსახად ანტიკონსტიტუციურია და ამას არც გოგის შემთხვევაში გადაუხვია სახელმწიფომ. ეს არის თეა წულუკიანის შემოღებული სრულიად ბრიყვული პრაქტიკა.
ლევან ჯავახიშვილი, „ალია“
კომენტარები