“დიმიტრი გვრიტიშვილმა აღიარა, რომ მოსამართლეობის კანდიდატებთან გასაუბრების წესი თვითონ დაწერა…”

იუსტიციის უმაღლესი საბჭოს არამოსამართლე წევრი, ნაზი ჯანეზაშვილი, სოციალურ ქსელში, წერს:

“დიმიტრი გვრიტიშვილმა აღიარა, რომ უზენაესი სასამართლოს მოსამართლეობის კანდიდატებთან გასაუბრების წესი თვითონ დაწერა, უბრალოდ როგორც მისი განცხადებიდან ირკვევა, ამაში პრობლემას ვერ ხედავს.

ამ პროექტით მან შემოგვთავაზა, რომ კანდიდატებთან კითხვების დასმის უფლება შემეზღუდოს. ასევე მედიის როლი საჯარო მოსმენის პროცესში დაყვანილია – გასაუბრების დაწყებისას მხოლოდ რამდენიმე კადრის გადაღებამდე.

შესაბამისად, მოვუწოდებ ბატონ დიმიტრი გვრიტიშვილს, რომ საბჭოს სხდომაზე თვითონ წარმოადგინოს დადგენილების პროექტი განსახილველად, როგორც ავტორმა და გაგვაცნოს არგუმენტები.

ძალიან მოკლედ იმის შესახებ, თუ რატომ არ უნდა დაეწერა გვრიტიშვილს ეს პროექტი ახლა, რომელიც თვითონ არის უზენაესი სასამართლოს მოსამართლეობის კანდიდატი. აქვე დავამტებ, რომ ის დღეს თბილისის სააპელაციო სასმართლოს მოსამართლე და ადმინისტრაციულ საქმეთა პალატის თავმჯდომარეა.

იუსტიციის უმაღლესი საბჭოს სხდომა ჩატარდა 1 დეკემბერს, 15 საათზე. ამავე დღეს გვრიტიშვილი მთლიანად ჩამოშორდა კანდიდატების შერჩევის პროცესს, როგორც საბჭოს წევრი, რადგან უზენაესი სასამართლოს მოსამართლეობის კანდიდატია და ვალდებული იყო ასე მოქცეულიყო.

ორგანული კანონის თანახმად, იუსტიციის უმაღლესი საბჭოს წევრი, რომელიც ამავდროულად უზენაესი სასამართლოს მოსამართლეობის კანდიდატია ვერ სარგებლობს:

1. კანდიდატების შეფასების უფლებით;

2. ხმის მიცემის უფლებით;

3. კითხვის დასმის უფლებით.

ამ აკრძალვების იდეა ისაა, რომ აღმოიფხვრას ინტერესთა კონფლიქტი და მაქსიმალურად ობიექტურად წარიმართოს

კანდიდატების შერჩევის პროცესი.

რა ქნა გვრიტიშვილმა?

პროცესის ჩამოშორების შემდგომ, იმავე დღეს საბჭოს ვებგვერდზე გამოქვეყნდა გასაუბრების წესის პროექტი, რომელიც გვრიტიშვილის ავტორობით მომზადდა.

მიუხედავად იმისა, რომ კანონი უკრძალავს მას შერჩევის პროცესში მონაწილეობას, გვრიტიშვილი უფრო შორს წავიდა. მართალია პროცესში ოფიციალურად არ მონაწილეობს, მაგრამ მის მიერ გასაუბრების წესების შემუშავება, მას შემდეგ რაც კანდიდატად დარეგისტრირდა, ნიშნავს იმას, რომ – ის ამ პროცესის მონაწილეა.

თან კონტექსტს აქვს უდიდესი მნიშვნელობა. როცა სისტემა კლანურად იმართება, გვრიტიშვილის პროექტს დამტკიცების პერსპექტივა ცხადია, რომ აქვს.

ბოლოს დავამატებ, რომ ისე მომზადდა დადგენილების პროექტი, რომ 1 შეხვედრაც კი არ ჩატარებულა ამ საკითხზე, ელექტრონული ვერსიაც კი არ გამოუგზავნიათ ჩემთვის. ამ პროექტის არსებობის შესახებ მეც თქვენთან ერთად ვებგვერდიდან გავიგე”