“სანამ ოჯახში არ მოგიკვდებათ ვინმე, არ უნდა მიხვდეთ?” – როგორ გავრცელდა მოხუცთა თავშესაფარში ვირუსი?

დაავადებათა კონტროლის ეროვნული ცენტრის ხელმძღვანელის მოადგილემ პაატა იმნაძემ ტელეკომპანია „პალიტრანიუსის” გადაცემა „360 გრადუსში” განაცხადა:

„მეტი რა ვთქვა. ის, რაც გვერდზე ქვეყნებში ან შორს ხდებოდა, ამის მაგალითები ხომ იყო, ხომ ვიცით, რომ ეს დაავადება ასეთია. კი, ბატონო, 85% ყოველგვარი პრობლემის გარეშე გადაიტანს, მაგრამ ამოარჩევს ვიღაც მოწყვლადს ჩვენს შორის და იმას მოკლავს, აუცილებლად მეზობელს ან ოჯახის წევრს უნდა მოუვიდეს, რომ გავიგოთ? რთულია სხვის მაგალითზე ისწავლო? აუცილებლად საკუთარ მაგალითზე უნდა ისწავლო? ვიდრე ადამიანებს თვითონ, ოჯახში არ მოუკვდებათ ვინმე, არ უნდა მიხვდნენ, რომ წესები უნდა დაიცვან?

წერტილოვანი შეზღუდვები საჭირო ხდება იმიტომ, რომ მიუხედავად მრავალგზის თხოვნისა, რომ ადამიანებმა თვითონ მოახერხონ, დაიცვან უმარტივესი წესები – ნიღაბი და დისტანცია, იძულებული ვხდებით, წერტილოვანი შეზღუდვები შემოვიღოთ. მაგრამ ქვეყნის ჩაკეტვა და იმ შეზღუდვების შემოღება ძალიან ადვილი იქნებოდა, მაგრამ არ შეიძლება ქვეყანა ჩაკეტილი იყოს. მთავარი არის, რომ მაქსიმალურად ვეცადოთ დავიცვათ ელემენტარული წესები, ავადმყოფი, რა თქმა უნდა, იქნება, მაგრამ განსაკუთრებით დავიცვათ ასაკოვნები, ქრონიკული დაავადების მქონე პირები, რომ მათამდე არ მივუშვათ კორონავირუსი.

ასევე მნიშვნელოვანია, რომ ბიზნესის მეპატრონეებს არანაირი ჩაკეტვა არ დასჭირდებათ, სამსახურში რომ ყველა ავად გახდება, მომუშავე არ ეყოლება, იმას ჩაკეტვა რად უნდა?”

“ალია” შეგახსენებთ, მიუხედავად ქვეყნის ჩაკეტვისა, ქალაქების ჩაკეტვისა და ე.წ. წერტილოვანი შეზღუდვისა, მოხუცთა თავშესაფრებში კორონავირუსის გავრცელების რამდენიმე შემთხვევაა უკვე. რატომ ვერ უზრუნველჰყო სახელმწიფომ რისკჯგუფის დაცვა, ამ კითხვას არავინ პასუხობს!!!

უკაცრავად, ბატონო პაატა, მაგრამ თქვენც ასაკში ხართ და თქვენი კოლეგების უმეტესობაც და სანამ, რომელიმე მხცოვანი ჩინოვნიკი არ დაავადდება, არ უნდა მიხვდეთ, რომ მოხუცთა თავშესაფარს ყურადღება უნდა მიაქციოთ?