სომეხთა კათოლიკოს-პატრიარქის, გარეგინ II-სა და სომხეთის სამოციქულო ეკლესიის კიდევ ხუთი მაღალი იერარქის წინააღმდეგ აღძრულ სისხლის სამართლის საქმეზე პირველი წინასასამართლო სხდომა 7 აგვისტოს გაიმართება.
გარეგინ II სასამართლოშია დაბარებული.
ბრალი წარდგენილი აქვთ მთავარეპისკოპოსებს ნათან ჰოვანისიანსა და ჰაიკაზუნ ნაჯარიანს, ასევე ეპისკოპოსებს ვაჰან ჰოვანისიანს, ედგარ ჰაკობიანსა და არტურ ჰაკობიანს, რომლებიც სომხეთის სამოციქულო ეკლესიის უმაღლესი სასულიერო საბჭოს წევრები არიან.
პროკურატურის ცნობით, სასულიერო პირებმა თანამდებობრივი უფლებამოსილების გამოყენებით კანონიერ ძალაში შესული სასამართლო აქტის აღსრულებას განზრახ შეუშალეს ხელი.
გამოძიების ვერსიით, საქმე მასიაცოტნის ეპარქიის ყოფილი წინამძღვრის, ეპისკოპოს გევორგ საროიანის თანამდებობიდან გადაყენებას უკავშირდება.
ეჩმიაძინის განცხადებით, საროიანი 2026 წლის იანვარში უფლებამოსილების ბოროტად გამოყენების, მოვალეობების შეუსრულებლობისა და ეპარქიის სასულიერო პირებზე ზეწოლის გამო გაათავისუფლეს.
საროიანმა გადაწყვეტილება საქალაქო სასამართლოში გაასაჩივრა, რომელმაც საბოლოო განაჩენის მიღებამდე მისი თანამდებობაზე დატოვება დაადგინა და ეკლესიას აუკრძალა მისთვის ეპარქიის მართვაში ხელის შეშლა.
მიუხედავად სასამართლოს გადაწყვეტილებისა, გარეგინ II-მ და უმაღლესმა სასულიერო საბჭომ საროიანს სასულიერო ხარისხი ჩამოართვეს.
სომხეთის სამოციქულო ეკლესია ბრალდებას კატეგორიულად არ ცნობს და აცხადებს, რომ საერო სასამართლოს ეკლესიის კანონიკურ და შიდა მმართველობით საკითხებში ჩარევის უფლება არ აქვს.
ეკლესიის პოზიციით, სასულიერო ხარისხის ჩამორთმევის შემდეგ, გევორგ საროიანი ეპისკოპოსი აღარ იყო და ერისკაცად იქცა, შესაბამისად, სასამართლო სასულიერო პირებს ვერ დაავალდებულებდა მის ეპარქიის წინამძღვრად აღიარებას.
აღსანიშნავია, რომ გარეგინ II-ს სომხეთის დატოვება აკრძალული აქვს.
შეზღუდვის გამო მან თებერვალში ავსტრიაში გამართულ ეპისკოპოსთა საგანგებო შეხვედროებაში მონაწილეობა ვერ შეძლო, მარტში კი ვერ დაესწრო საქართველოს კათოლიკოს-პატრიარქ ილია II-ის დაკრძალვას.
კომენტარები