მწერალი, ლაშა ბუღაძე, სოციალურ ქსელში, წერს:
ეს შეხვედრა გუშინ გვქონდა ენგურის ხიდთან, ბანაკში.
სინდისის პატიმრების მშობლებს, ჩემს მეგობრებსა და თანამებრძოლებს ფრაგმენტები წავუკითხე ჩემი “დამკვირვებლიდან”. ამის შემდეგ ფენომენალური ცოდნისა და გამოცდილების მქონე ლილი ბეგიაშვილმა წაგვიკითხა ლექცია იმ უმძიმეს გამოცდილებაზე, რომელიც 2024 წლის არჩევნებზე მივიღეთ, თუმცა ამ გამოცდილების მქონეთ ახლა ბევრად უფრო მეტი ცოდნა გვაქვს, ვიდრე იმ კოშმარულ დღეს გვქონდა, და ეს პლუსია. ახლა მეტი ვიცით. გამოცდილება გაკვეთილად უნდა იქცეს, თუ არა და, უარეს კატასტროფად დაგვიბრუნდება ყოველ ჯერზე.“ერთი ხალხი – ერთი საქართველოს” კამპანიის სულისკვეთებით ჩვენმა მეგობრებმა არაერთი ადგილი დაიარეს და ბევრ ადამიანს შეხვდნენ (ახლაც ხვდებიან). და აი, ამის შემყურემ და მონაწილემ, კიდევ ერთხელ გავიაზრე თითქოსდა ყველასთვის ცნობილი, მაგრამ რატომღაც იგნორირებული ჭეშმარიტება: ახლა ყველაზე მნიშვნელოვანი საქართველოს სხვადასხვა რეგიონში სიარული და ადამიანებთან შეხვედრაა! შეხვედრა, საუბარი და შინაარსის გაჩენა!დიდია ეს პატარა საქართველო და ძალიან ბევრი ადამიანია, რომელიც უიმედობას, დაუცველობას და უნდობლობას ყავს შეპყრობილი. გუშინ ასეც მითხრეს – ამდენი ამედგაცრუების მერე ვის უნდა ვენდოო… და ვის ვახსოვართო. დაუცველობა და იგნორირებულობა!..ვის ვუტოვებთ ამ ხალხს? უიმედობას? აგრესიულ უმცირესობას ქოცების სახით, რომელთაც მძევლად ვყავართ აყვანილი? ეს ხალხი აქციებზე არ და ვერ დადის… და ამიტომ უარვყოთ? რა შინაარსს ვაძლევთ მათ? რა მიზანს? რის იმედს? სასწაულს ველით? სასწაულის მოლოდინში 2028 წელიც მოვა და ამ პასიურობით საკონსტიტუციო უმრავლესობას აიღებს ივანიშვილი (რაც 2024 წელს ვერ მოახერხა, იმის მიუხედავად, რომ გადააყალბა და რა რეპრესიულ მეთოდებს აღარ მიმართა).არადა, უკვე დარაზმვაა საჭირო… და საქმე ახლა ბევრად უფრო რთულადაა, ვიდრე 2024 წელს იყო. მინიმუმ, 20 000-მდე დამკვირვებელია საჭიროო… მებრძოლი და მოტივირებული მოქალაქეები!პოლიტიკოსებო, ვიცით რომ ავტორიტარიზმში პოლიტიკის წარმოება თითქმის შეუძლებელია, პერსპექტივა უმეტესად ციხეა, მაგრამ როგორც არ უნდა იყოს, მობილიზება გმართებთ! თქვენ – უპირველეს ყოვლისა! გადით სოციალური ქსელებიდან სოფლებში, რეგიონებში, ხალხში! გადით! ერთხელ და ორჯერ არ მიგვიღებენ? მესამე ჯერზე ნდობა დაბრუნდება!აბა, ალტერნატივა რა არის? დავიწყებისთვის განწირული პოლემიკა ფეისბუქში და მხოლოდ აქტივობის სიმულაციური ვიდეოების ჩაწერა? ლოდინი? რისი? რას ველოდებით? სასწაულს? აღარ ვიცნობთ საქართველოს და ჩვენს აღქმებში ვართ გამოკეტილი, ადამიანები კი მიზანს და ამოცანას უნდა ხედავდნენ და არა ბუნდოვანებას! ქვეყანა დიდია და იმ ხალხსაც დავფანტავთ ასე, ვინც 2024 წელს იმედით და მოტივაციით იყო აღსავსე! უკვე ვკარგავთ დროს…
კომენტარები