თბილისში, სამი წლის წინ, გაურკვეველ ვითარებაში გარდაცვლილი 12 წლის ანი იანუშაიტიტეს დედა ირაკლი კობახიძეს მიმართავს და მასთან შეხვედრას ითხოვს.
“ვითხოვ შეხვედრას, კვლავ ვითხოვ, ჩატარდეს ჩემი შვილის მკვლელობასთან დაკავშირებით ეფექტური გამოძიება, ვინაიდან, ვთვლი, რომ არ არის ახლა ეფექტური გამოძიება. 1 თვეა ვითხოვ ერთ-ერთი მოწმის დაკითხვას და ვერ მოხერხდა. ერთი გამომძიებელი წასულია შვებულებაში, ხომ შეიძლება ის ჩანაცვლდეს სხვით?! პრაქტიკულად საქართველოში კამერის წინ თუ არ მოხდა დანაშაული გამოძიება ვერ ჩატარდება, მე ამას მივხვდი. ესაა დაცინვა, არაპროფესიონალიზმი, გულგრილობა, მავნებლობა, ყველაფერია ერთად შერწყმუული ვერც გამოვყოფ.
აქ კითხვები აღარ არის, ეს მართლა მკვლელობაა. კითხვები უბრალოდ იმ ნაწილში მაქვს, რომ რატომ არ უნდათ რომ აღიარონ რომ ესაა მკვლელობა. 3 წელი გავიდა, კომისიური ექსპერტიზა დღემდე ვერ შედგა, ვერ დაჯდა სამი ექსპერტი, რომ დასკვნა დაწერონ, ეს მიჩენს ეჭვებს. ის მიჩენს ეჭვებს, რომ მე-18 დღეს ყველაფერი გაჩეხეს იქ და სახე უცვალეს იმ ადგილს, როგორ შეიძლება ამ ყველაფერზე ეჭვი არ გაგიჩნდეს ადამიანს, თორემ ჩემი შვილი რომ მოკლულია ამაში ეჭვი არ მეპატრება დაზიანებები სახიდან გამომდინარე, რა მდგომარეობაში იყო ბავშვი, ნაბრძოლი იყო, დაგლეჯილი და დაბრდღვნილი. რა თქმა უნდა იმ ადგილას [სადაც იპოვეს] ვერ მოხვდებოდა, საყურე თმაში ვიპოვეთ, ხელში თმა ჰქონდა თავდამსხმელზე გამოგლეჯილი, უკნიდან წვივში წიხლი ჰქონდა ჩარტყმული, მეტრიან მილზეა ბავშვი ძალით გადაყვანილი და ფეხები აქვს მაგ დროს დაგლეჯილი. ეჭვს ბადებს, რომ მეუბნებიან ეს ლინზაზე აკრული შენ გეჩვენება, გადაცდენით არის ბავშვი დაღუპული, ადგილი რომ გამიჩეხეს, დაზარალებულის სტატუსის მოცემა რომ არ უნდოდათ, კამერის ჩანაწერებზე რომ მითხრეს დაგვავიწყდა აგვეღოო, შემდეგ აღმოჩნდა, რომ მისულები იყვნენ და ამოღებული არ იყო შეგნებულად, მერე მესამე ვერსია თქვეს მივედით და არაფერი არ ჩანდაო”. – ამბობს იანუშაიტიტეს დედა.
მისი თქმით, 39 დაზიანება სხეულზე, დამტვრეული ტელეფონი თითის ანაბეჭდების გარეშე, „დავიწყებული“ კამერები “არწმუნებს”, რომ მისი 12 წლის გოგო მოკლეს. დედას კითხვებს გამოძიების “არაეფექტურად მუშაობა” უჩენს ეჭვს.
“გთხოვთ როგორც მამას, პირველ რიგში, ჩაერთეთ ამ საქმეში, აიყვანეთ ეს საქმე პირად კონტროლზე და ნახეთ, რომ ამ საქმეში არაფერი არ ხდება და წინსვლა არაა, გადაახედინეთ ეს საქმე თავიდან, შემოწმდეს ყველაფერი, იქნებ რაღაც ნიუანსი იპოვოთ, თორემ დარჩენილია ეს საქმე გამოძიების გარეშე და ვიღაც დადის, ვინც 12 წლის გოგონას სიცოცხლე იმსხვერპლა, ყველასთვის საშიშია, როდესაც ასეთი ადამიანი თავისუფლად დადის და მე, უბედური დედა, ვიხვეწები 3 წელია, მომიძებნეთ ჩემი შვილის მკვლელი, გავიგო რა ვითარებაში მოკვდა ჩემი შვილი – ამაზე არ მაქვს პასუხი, არ მაქვს გამოხმაურება და არ მაქვს შედეგი, რაც ყველაზე მნიშვნელოვანია”- აღნიშნავს ის.
2023 წლის 17 მარტს დიდ დიღომში, პეტრიწის ქუჩაზე 12 წლის ანა იანუშაიტიტე გარდაცვლილი იპოვეს. ოჯახი აცხადებს, რომ გოგო მოკლეს, რადგან მას სხეულზე დაზიანებები ჰქონდა.
კომენტარები