ქართული ოცნების პრემიერი, ირაკლი კობახიძე, ბრიტანეთის სანქციებზე საუბრისას, რამდენიმე მესიჯბოქსს ავრცელებს. რამდენად ლოგიკურ ბმაშია ისინი ერთმანეთთან, თავად გადაწყვიტეთ.
პირველი – ამტკიცებს, რომ “ოცნება” არაა ჩამოშლის პირას:
საზოგადოებამ იხილა, რომ როგორც კი რადიკალურმა ოპოზიციამ უცხოელი პატრონების მხრიდან „იმედისა“ და „პოსტვის“ სანქცირებით ერთჯერადი დახმარება მიიღო, მათ ერთიანი „მესიჯბოქსით“ დაიწყეს აბსურდის მტკიცება, რომ, თითქოს, ხელისუფლება და თავისუფალი ქართული მედია ჩამოშლის პირას იყო.
მეორე – თვლის, რომ ოპოზიციას იმედი აქვს, გარე ძალა დაეხმარება ხელისუფლებაში მოსვლაში და ეს გარე ძალა ჩაბუდებულია ევროპაში.
იმედი აქვთ. გარე ძალაში, რა თქმა უნდა, ის ძალა იგულისხმება, რომელიც ადგილობრივ აგენტურას აძლევს დავალებას, ამავდროულად კი არწმუნებს, რომ ახლაც და მომავალშიც, დავალებების უპირობოდ შესრულების შემთხვევაში, ხელისუფლებაში მოსვლაში დაეხმარება, თუმცა, მუშაობით არა საქართველოსთვის, არამედ, მათი ინტერესებისთვის უნდა იმუშაონ. ამ ძალებს „დიფ სთეითს“ დავარქმევთ, გლობალურ ომის პარტიას თუ ოლიგარქ ოჯახებს, ფაქტია, რომ სწორედ ამგვარი, არაფორმალური ძალაა ჩაბუდებული დღეს ევროპულ ბიუროკრატიაში.
მესამე – ამტკიცებს, რომ ოპოზიცია გაერთიანებას და ამ გაერთიანების აშშ–ისთვის შეთავაზებას გეგმავს:
ცალკეულმა უცხოელმა აგენტმა, ბრიტანული სანქციების ფონზე, სხვა რადიკალებს გაერთიანებისკენ და ამ გაერთიანების დასავლეთისთვის, უფრო კონკრეტულად, ამერიკის შეერთებული შტატებისთვის „ქართული ოცნების“ პოლიტიკურ ალტერნატივად შეთავაზებისკენ მოუწოდა. იქვე დასძინა, რომ ვაშინგტონისთვის შეთავაზებულ მათ კოალიციას აუცილებლად შეუერთდება პარტია „ლელოც“ თავის ლიდერებთან ერთად, რადგან პროცესებისგან დისტანცირება ამ პარტიისთვის რთული იქნება.
მეოთხე – კობახიძე ამტკიცებს, რომ აშშ არ დაუჭერს მხარს ქართულ ოპოზიციას და იქვე, ნებისმიერ მხარდაჭერას, შიდა საქმეებში ჩარევად აცხადებს. ცნობისთვის, აშშ–ის მიერ, მადუროს თავისივე ტერიტორიაზე დაჭერის ამბავს კობახიძე არ ახსენებს.
აშშ-ის მოქმედ ადმინისტრაციას ღიად აქვს გაცხადებული იმგვარი საგარეო პოლიტიკური კურსი, რომელიც უცხო ქვეყნების შიდაპოლიტიკურ საქმეებში ჩაურევლობას გულისხმობს.
პრეზიდენტ ტრამპის ბრძანებით დემონსტრაციულად დახურეს რევოლუციის დამფინანსებელი ფონდები, მათ შორის USAID და NED, თანაც დახურეს ისე, რომ ღიად ამხილეს მათი ფარული ჩარევები უცხო ქვეყნების პოლიტიკურ ცხოვრებაში, რევოლუციების მოწყობასა და მთავრობების ძალადობრივი, ხალხის ნების საწინააღმდეგოდ შეცვლაში. არჩევნებში ახალი ადმინისტრაციის გამარჯვების შემდეგ კვირა არ გავა, რომ პოლიტიკურმა ლიდერებმა, მათ შორის ვენსმა, რუბიომ, გაბარდმა და სხვებმა, ხაზგასმით არ აღნიშნონ, რომ აშშ აღარ აპირებს ჩარევას სხვა ქვეყნების პოლიტიკურ პროცესებში.
მეხუთე – მიუხედავად იმისა, რომ ასე ცხადია მისთვის ყოველივე – საქართველოში რადიკალური ძალები ჰგონია ჰყავს, რომლებიც მისი აზრით იმართება ევროპიდან და ამერიკა კი, ყოველ კვირა, უდასტურებს, რომ არ აპირებს ვინმეს მხარდაჭერას მის წინააღმდეგ, – კობახიძე მაინც ვერ იგებს ბოლომდე რაშია საქმე და მაინც უჩნდება ერთი კითხვა, დამატებითი:
რადგან ჩვენთვის კარგად არის ცნობილი, რომ ოპოზიციად წოდებულმა აგენტურამ ძალიან კარგად იცის, თუ ვინ არის მისი პატრონი ქვეყნის ფარგლებს გარეთ, როდესაც 99 პროცენტით კვლავ გაერთიანებული აგენტურული ოპოზიცია ისევ აშშ-ს სთავაზობს საკუთარ „მომსახურებას“ მათი გაცხადებული პოლიტიკის მიუხედავად, რომ არ ჩაერევიან უცხო ქვეყნის შიდა საქმეებში, ეს ფაქტი ჩვენთვის დამატებით კითხვის ნიშნებს ბადებს.
მეექვსე: ამერიკა დისტანცირებულია – ტრამპი ებრძვის „დიფ სთეითს” ბოლოს და ბოლოს, თუ არ ებრძვის? – თუ ებრძვის, მაშინ არ უნდა იყოს დისტანცირებული – “ქართული ოცნებისგან”.
ჩვენ კვლავაც ვინარჩუნებთ იმედს, რომ ე.წ. „დიფ სთეითის“ წინააღმდეგ დონალდ ტრამპის მიერ დაანონსებული ბრძოლა ამ უკანასკნელის გამარჯვებით დასრულდება. ამის საუკეთესო დასტური საქართველოს მიმართ ამერიკული ადმინისტრაციის დამოკიდებულების ცვლილება იქნება.
მეშვიდე – ამერიკა ალოგიკურად იქცევა და აქ კობახიძეს ისევ ბევრი კითხვა უჩნდება – ტრამპს კი სთხოვს დაუმტკიცოს ერთგულება “დიფ სთეითებთან” ბრძოლაში:
ღირებულებითი თანხვედრის ფონზე, საქართველოს მიმართ აშშ-ის დღევანდელი დისტანცირებული პოზიცია ალოგიკურია და არაერთ კითხვის ნიშანს ბადებს. საქართველოს მიმართ დამოკიდებულების ცვლილება დაადასტურებს, რომ „დიფ სთეითის“ წინააღმდეგ გამოცხადებული ბრძოლა არა მოჩვენებითი მოვლენა და არაფორმალური ძალების რებრენდინგის მცდელობა, არამედ გულწრფელი და რეალურია. ჩვენ კვლავაც ვინარჩუნებთ ოპტიმისტურ მოლოდინს. ყველაფერს უახლოეს მომავალში მოეფინება ნათელი.
მერვე – კობახიძე ამტკიცებს, რომ გასულ დღეებში კიდევ ერთხელ დარწმუნდა როგორი ლეგიტიმურია “ქართული ოცნება” – ცნობისთვის, აქ არ ახსენებს ირაკლი რუხაძეს, რომელმაც სანქციებამდე გაყიდა არხი, ხოლო სანქციების გამოცხადებისთანავე, “იმედის” სამეთვალყურეო საბჭო. სავარაუდოდ, ეს დეტალი ლეგიტიმაციისა და ერთ მუშტად შეკვრის მაგალითად არ გამოადგა?
კიდევ ერთხელ აღვნიშნავთ, რომ გასულ დღეებში განვითარებულმა მოვლენებმა ყველაზე უკეთ წარმოაჩინა, თუ ვინ არის ქართველი ხალხის ლეგიტიმაციით აღჭურვილი ქართული ძალა და ვინ იღწვის ხელისუფლებაში მოსახვედრად მხოლოდ იმისათვის, რომ საქართველოში უცხოელი პატრონების მანკიერ ინტერესებს ემსახუროს.
კომენტარები