გამოცემა POLITICO-ს ცნობით, ევროკავშირის ელჩებმა დაამტკიცეს სამართლებრივი მექანიზმი, რომლის საფუძველზეც რუსეთის სახელმწიფო აქტივები ევროპაში შესაძლოა სამუდამოდ გაყინული დარჩეს.
როგორც POLITICO წერს, ევროკავშირის ეს გადაწყვეტილება ძირს უთხრის კრემლის იმედებს, რომ ომის შემდგომი სამშვიდობო შეთანხმების ფარგლებში გაყინული თანხები განიბლოკება.
გამოცემა წერს, რომ ევროკავშირმა სამართლებრივი მექანიზმი უნგრეთის პრემიერ-მინისტრის, ვიქტორ ორბანის გვერდის ავლით დაამტკიცა.
დანიის საბჭოს თავმჯდომარეობის განცხადებით, ხუთშაბათს ევროკავშირის ელჩებმა საგანგებო უფლებამოსილება მიანიჭეს ევროკომისიას, რომ რუსეთის სახელმწიფო აქტივები, 210 მილიარდი ევროს ოდენობით, დაბლოკილი იყოს მანამ, სანამ კრემლი უკრაინისთვის ომისშემდგომ რეპარაციებს არ გადაიხდის.
მათ განაცხადეს, რომ ელჩებმა დაამტკიცეს წერილობითი პროცედურის დაწყება ოფიციალურად ევროკავშირის საბჭოს მიერ გადაწყვეტილების მისაღებად. წერილობითი კენჭისყრა დღეს, ბრიუსელის დროითს 17:00 საათზე უნდა გაიმართოს. როგორც POLITICO წერს, გადაწყვეტილება მიღებულ იქნა „ძალიან მკაფიო უმრავლესობით“.
საგანგებო მუხლი ფაქტობრივად ცვლის არსებულ წესებს, რომლებიც ევროკავშირის ქვეყნებს ავალდებულებდა, რომ ერთხმად განეახლებინათ სანქციები ყოველ ექვს თვეში ერთხელ.
“ამით კრემლისადმი მეგობრული ქვეყნები კარგავენ ძალაუფლებას, განბლოკონ გაყინული თანხები სანქციების განახლებაზე უბრალოდ ხმის წინააღმდეგ მიცემით“, – წერს POLITICO.
POLITICO-ს ცნობით, იურიდიულ ტექსტში, რომელიც კომისიამ მოამზადა, ნათქვამია, რომ აქტივების გაყინულ მდგომარეობაში შენარჩუნება „წარმოადგენს ზომას, რომელიც მიზანშეწონილია რუსეთის ქმედებებით გამოწვეული, კავშირის ეკონომიკურ მდგომარეობაზე უპრეცედენტო მასშტაბის შემდგომი მძიმე შედეგების თავიდან ასაცილებლად“.
როგორც POLITICO წერს, ევროკავშირის აღმასრულებელმა ორგანომ თავდაპირველად ეს სამართლებრივი მექანიზმი იმ ცალკეული გეგმის გასაძლიერებლად შესთავაზა, რომელიც გულისხმობდა უკრაინისთვის რუსეთის 210 მილიარდი ევროს გაყინული აქტივების მობილიზებას, რომელთა უმეტესი ნაწილი ბელგიაში არსებულ Euroclear-ში ინახება.
თუმცა, ბელგია ეწინააღმდეგება გეგმას იმის შიშით, რომ რუსეთის მიერ თანხის უკან დაბრუნების შემთხვევაში მას მოუწევს სესხის დაფარვა. ბელგიის შეშფოთების შესამსუბუქებლად, კომისიამ იმ სამართლებრივი წინადადებიდან, რომელიც ხუთშაბათს დამტკიცდა, ამოიღო სესხის შესახებ მითითებები.
ევროკავშირის გადაწყვეტილებას აპროტესტებს უნგრეთი. როგორც უნგრეთის პრემიერ-მინისტრი ვიქტორ ორბანი აცხადებს, ამ გადაწყვეტილებით ბრიუსელი დღეს „რუბიკონს კვეთს“ და ევროკავშირს გამოუსწორებელ ზიანს აყენებს.
“ეს ყველაფერი ხდება დღისით-მზისით, ევროპული საბჭოს შეხვედრამდე ერთ კვირაზე ნაკლები ხნით ადრე. ამით ევროკავშირში კანონის უზენაესობა იცვლება ბიუროკრატების მმართველობით. სხვა სიტყვებით რომ ვთქვათ, ბრიუსელში დიქტატურა მყარდება. უნგრეთი აპროტესტებს ამ გადაწყვეტილებას და ყველაფერს გააკეთებს კანონიერი წესრიგის აღსადგენად“, – დაწერა ვიქტორ ორბანმა X-ზე.
სლოვაკეთის პრემიერ-მინისტრმა რობერტ ფიცომ ასევე მისწერა წერილი ევროპული საბჭოს პრეზიდენტს, ანტონიო კოშტას, რათა მისი მთავრობის წინააღმდეგობა დაეფიქსირებინა „უკრაინის ფინანსური საჭიროებების ნებისმიერი გადაწყვეტის მიმართ, რომელიც მოიცავს უკრაინის სამხედრო ხარჯების დაფარვას მომდევნო წლებისთვის“.
კომენტარები