ბათუმელი მედროშე 11 დღეა შიმშილობს, აღარ იღებს წყალსაც

“აქციაზე დაკავებული ზურა ჭავჭანიძე 11 დღეა შიმშილობს, არ იღებს წყალს” – ამის შესახებ ნათია თოხაძე სოციალურ ქსელში წერს.

მისი თქმით, ბათუმელ მედროშეს ესაუბრა, მისი გზავნილი კი ბრძოლის გაგრძელებაა:

ვესაუბრე ზურა ჭავჭანიძეს

შეგახსენებთ, რომ ზურა 11 დღეა შიმშილობს. მიმართავს შიმშილობის უკიდურეს ფორმას – არც წყალს არ იღებს.

დამაბარა გადმოგცეთ:

“მხნედ ვარ, კარგად ვარ. ექიმი დღეში ორჯერ მამოწმებს. სასერნოდაც გავდივარ, ოღონდ მხოლოდ ნახევარი საათით, მეტს ვერ ვძლებ. ეხლა ვგრძნობ, რომ ცოტა მეტყველებაც მიჭირს.

რას დაგიბარებთ?

რას და დგომა ბოლომდე!

დგომა ბოლომდე!

მტერი გადაშენებას გვიპირებს. ამიტომ მე თავს ვწირავ სამშობლოსთვის.

ვერ გავიგე ვკვდები თუ ვრჩები? წესით აღარ უნდა ვიყო. 11 დღე ამის გაძლება სასწაულია. ყველას უკვირს რა მაძლებინებს.

რა მაძლებინებს?

ალბათ სიმართლე მაძლებინებს!

და ალბათ ისიც, რომ მე ჩემი ორგანიზმი და შთაგონების ძალა კარგად ვიცი.

დედამიწის ზურგზე ნებისმიერ ადამიანს შევეჯიბრები სიყვარულში და თუ ვინმემ მაჯობა, მაინც მე ვიქნები გამარჯვებული, რადგან გამოდის რომ სიყვარულმა გაიმარჯვა! მადლობა შენ, რომ მაძლებინებ და ამხელა სიყვარულს მიგზავნი” – წერს თოხაძე. 

ზურაბ ჭავჭანიძე 4 ოქტომბრის საქმეზე სისხლის სამართლის მუხლითაა დაკავებული. მას ორთვიანი წინასწარი პატიმრობა აქვს შეფარდებული.